دنیا سے الگ ہم نے میخانے کا در دیکھا

دنیا سے الگ ہم نے میخانے کا در دیکھا

میخانے کا در دیکھا اللہ کا گھر دیکھا

گوشے سے نشیمن کے آہوں کا اثر دیکھا

صیاد کا گھر جلتے بے برق و شرر دیکھا

دونوں کے مزے لوٹے دونوں کا اثر دیکھا

اللہ کا گھر دیکھا میخانے کا در دیکھا

یوں حشر میں سیریں کیں فردوس و جہنم کی

کچھ دیر ادھر دیکھا کچھ دیر ادھر دیکھا

اے شیخ وہ کعبہ ہو یا ہو در مے خانہ

تو نے مجھے جب دیکھا سجدے ہی میں سر دیکھا

نالہ ہمیں کرنا تھا دم عشق کا بھرنا تھا

سو رنگ سے مرنا تھا ہر رنگ سے مر دیکھا

جب موج ابھرتی ہے کہتی ہے وہ شوخی سے

بازو میں بط مے کے سرخاب کا پر دیکھا

ٹانکے دیئے جاتے ہیں کیوں لب سیے جاتے ہیں

ہنسنے کا مزا تو نے اے زخم جگر دیکھا

نسبت نہیں مجھ کو کچھ بیکس کے بجھے دل سے

بجھتے ہوئے تجھ کو بھی آئے شمع سحر دیکھا

سہمے ہوئے بیٹھے ہیں کھوئے ہوئے بیٹھے ہیں

جس رات کے ارماں تھے اس رات کو ڈر دیکھا

پھل پھول نہیں لاتے یہ باغ محبت میں

ہر نخل تمنا کو بے برگ و ثمر دیکھا

کعبے میں نظر آئے جو صبح اذاں دیتے

میخانے میں راتوں کو ان کا بھی گزر دیکھا

کچھ کام نہیں مے سے گو عشق ہے اس شے سے

میں رند ریاضؔ ایسے دامن بھی نہ تر دیکھا

duniya se alag ham ne maikhane ka dar dekha

maikhane ka dar dekha allah ka ghar dekha

goshe se nasheman ke ahon ka asar dekha

sayyad ka ghar jalte be barq-o-sharar dekha

donon ke maze laute donon ka asar dekha

allah ka ghar dekha maikhane ka dar dekha

yun hashr mein sairen kin firdaus-o-jahannam ki

kuchh der idhar dekha kuchh der idhar dekha

ai shaikh wo kaaba ho ya ho dar mai khana

tu ne mujhe jab dekha sajde hi mein sar dekha

nala hamen karna tha dam ishq ka bharna tha

sau rang se marna tha har rang se mar dekha

jab mauj ubharti hai kahti hai wo shokhi se

bazu mein bat mai ke surkhab ka par dekha

tanke diye jate hain kyun lab saye jate hain

hansne ka maza tu ne ai zakhm-e-jigar dekha

nisbat nahin mujh ko kuchh bekas ke bujhe dil se

bujhte hue tujh ko bhi ae sham-e-sahar dekha

sahme hue baithe hain khoe hue baithe hain

jis rat ke arman the is rat ko dar dekha

phal phul nahin late ye bagh-e-mohabbat mein

har nakhl-e-tamanna ko be barg-o-samar dekha

kaabe mein nazar ae jo subh azan dete

maikhane mein raton ko un ka bhi guzar dekha

kuchh kam nahin mai se go ishq hai is shai se

main rind riyaz aise daman bhi na tar dekha