دن بدن اب لطف تیرا ہم پہ کم ہونے لگا

دن بدن اب لطف تیرا ہم پہ کم ہونے لگا

یا تو تھا ویسا کرم یا یہ ستم ہونے لگا

سچ کہو تقصیر کیا ہے عاشق مظلوم کی

نیمچا ترچھی نگہ کا کیوں علم ہونے لگا

تیغ ابرو کوں نپٹ کستے ہو پن حیراں ہوں میں

کون سے بیمار پر یہ آب دم ہونے لگا

شکر اللہ سرو رعنا کے تصور کے طفیل

رفتہ رفتہ دل مرا باغ ارم ہونے لگا

بس کرو اے شاہ فوج حسن قتل عام کوں

عاشقوں کی آہ کا نیزہ علم ہونے لگا

تجھ کوں اے آہو نگہ کس نے سکھایا یہ طرح

یا تو تھا اوروں سیں رم یا ہم سیں رم ہونے لگا

ہجر کی راتوں میں یہ مصرع ہوا ورد سراج

دن بہ دن اب لطف تیرا ہم پہ کم ہونے لگا

din badan ab lutf tera ham pe kam hone laga

ya to tha waisa karam ya ye sitam hone laga

sach kaho taqsir kya hai ashiq-e-mazlum ki

nimcha tirchhi nigah ka kyun alam hone laga

tegh-e-abru kun nipat kaste ho pan hairan hun main

kaun se bimar par ye ab-e-dam hone laga

shukr allah sarw raana ke tasawwur ke tufail

rafta rafta dil mira bagh-e-iram hone laga

bas karo ai shah fauj-e-husn qatl-e-am kun

ashiqon ki ah ka neza alam hone laga

tujh kun ai ahu nigah kis ne sikhaya ye tarah

ya to tha auron sin ram ya ham sin ram hone laga

hijr ki raton mein ye misra hua wird-e-siraj

din ba din ab lutf tera ham pe kam hone laga