دل کسی مشتاق کا ٹھنڈا کیا

دل کسی مشتاق کا ٹھنڈا کیا

خوب کیا آپ نے اچھا کیا

آج حیا آنکھ کی کچھ اور ہے

چاہنے والا کوئی پیدا کیا

ہائے رے پیماں شکنی کے مزے

جب میں گیا وعدۂ فردا کیا

کچھ تو کسی نے انہیں سمجھا دیا

ہم جو گئے آج تو پردہ کیا

گو کہ نہ تھا میری طرف منہ مگر

ترچھی نگاہوں سے وہ دیکھا کیا

آہ کی تقصیر نہیں ہے مگر

بے اثری نے مجھے رسوا کیا

کہہ کے لے آتے ہیں تمہیں ہوشیار

یہ نہ کیا ہم نے تو پھر کیا کیا

موت کے صدقے کہ یہ کہتے تھے وہ

آج نہ اس نے کوئی پھیرا کیا

آپ کے احسان کی تعریف ہے

میں نے اگر شکوۂ اعدا کیا

نام میرا سنتے ہی شرما گئے

تم نے تو خود آپ کو رسوا کیا

قدر مری تم نے نہ کی ورنہ میں

کیا کہوں کیا آپ کو سمجھا کیا

میں نے تو اے جان جہاں جان دی

تم نے ادا حق وفا کیا کیا

پھر وہ نہائے عرق شرم میں

کس نے مرے عشق کا چرچا کیا

میں دل صد چاک کا کہتا تھا حال

شانہ عبث زلف سے الجھا کیا

اس کی نظر میں ہوا ہلکا نسیمؔ

مجھ سے مرے شوق نے کیا کیا کیا

dil kisi mushtaq ka thanda kiya

khub kiya ap ne achchha kiya

aj haya ankh ki kuchh aur hai

chahne wala koi paida kiya

hae re paiman shikani ke maze

jab main gaya waada-e-farda kiya

kuchh to kisi ne unhen samjha diya

ham jo gae aj to parda kiya

go ke na tha meri taraf munh magar

tirchhi nigahon se wo dekha kiya

ah ki taqsir nahin hai magar

be asari ne mujhe ruswa kiya

kah ke le ate hain tumhen hoshyar

ye na kiya ham ne to phir kya kiya

maut ke sadqe ke ye kahte the wo

aj na us ne koi phera kiya

ap ke ehsan ki taarif hai

main ne agar shikwa-e-aada kiya

nam mera sunte hi sharma gae

tum ne to khud ap ko ruswa kiya

qadr miri tum ne na ki warna main

kya kahun kya ap ko samjha kiya

main ne to ai jan-e-jahan jan di

tum ne ada haq-e-wafa kya kiya

phir wo nahae araq-e-sharm mein

kis ne mire ishq ka charcha kiya

main dil-e-sad chak ka kahta tha hal

shana abas zulf se uljha kiya

us ki nazar mein hua halka nasim

mujh se mire shauq ne kya kya kiya