دل کو لے کر ہم سے اب جاں بھی طلب کرتے ہیں آپ

دل کو لے کر ہم سے اب جاں بھی طلب کرتے ہیں آپ

لیجئے حاضر ہے پر یہ تو غضب کرتے ہیں آپ

مورد تقصیر گر ہوتے تو لازم تھی سزا

یہ جفا پھر کہئے ہم پر کس سبب کرتے ہیں آپ

کرتے ہو ابرو سے کشتہ رخ سے دیتے ہو جلا

حسن میں اعجاز کیا کیا روز و شب کرتے ہیں آپ

قیس سے جو تھا کیا در پردہ لیلیٰ نے سلوک

سو وہی اے مہرباں ہم سے بھی اب کرتے ہیں آپ

بے کلی ہوتی ہے حسرت سے دل صد چاک کو

اپنی زلف عنبریں کو شانہ جب کرتے ہیں آپ

ہم نے پوچھا پھر بھی اس کی جاں پھری سب جسم میں

نزع میں دوری سے جس کو جاں بلب کرتے ہیں آپ

ہنس کے فرمایا نظیرؔ اپنی دعائے لطف سے

یہ بھی ہو سکتا ہے کیا اس کا عجب کرتے ہیں آپ

dil ko le kar ham se ab jan bhi talab karte hain ap

lijiye hazir hai par ye to ghazab karte hain ap

morid-e-taqsir gar hote to lazim thi saza

ye jafa phir kahiye ham par kis sabab karte hain ap

karte ho abru se kushta rukh se dete ho jala

husn mein ejaz kya kya roz-o-shab karte hain ap

qais se jo tha kya dar-e-parda laila ne suluk

so wahi ai mehrban ham se bhi ab karte hain ap

be kali hoti hai hasrat se dil-e-sad chak ko

apni zulf-e-ambarin ko shana jab karte hain ap

ham ne puchha phir bhi us ki jan phiri sab jism mein

nazaa mein duri se jis ko jan balb karte hain ap

hans ke farmaya nazir apni dua-e-lutf se

ye bhi ho sakta hai kya us ka ajab karte hain ap