دل کی چوری میں جو چشم سرمہ سا پکڑی گئی

دل کی چوری میں جو چشم سرمہ سا پکڑی گئی

وہ تھا چین زلف میں یہ بے خطا پکڑی گئی

صبح کوئے یار میں باد صبا پکڑی گئی

یعنی غیبت میں گلوں کی مبتلا پکڑی گئی

دل چڑھا مشکل سے طاق ابروئے خم دار پر

سو جگہ رستہ میں جب زلف رسا پکڑی گئی

جان کر آنکھیں چرائیں تو نے ہم سے بزم میں

تیری چوری دیکھ لی کیا بد نما پکڑی گئی

ہے اسی میں قلب محزوں شرطیہ کہتا ہوں میں

کھول مٹھی تیری چوری مہ لقا پکڑی گئی

مست ہو کر اس کی خوشبو سے گرا تھا بچ گیا

جب سنبھلنے کو وہ زلف مشک سا پکڑی گئی

ہر طرف صحن چمن میں کہتی پھرتی ہے نسیم

گل سے ہنستی کھلکھلاتی موتیا پکڑی گئی

اپنے ہاتھوں پر لئے پھرتے ہیں وہ ہر دم حلف

آڑ قسموں کی تو مجھ سے بارہا پکڑی گئی

رخ سے گل کو تھا تعلق زلف سے سنبل کو میل

ایک جا گانٹھا اسے یہ ایک جا پکڑی گئی

یار ہے خنجر بکف اور جاں نثاروں کا ہجوم

ہائے یہ کس جرم میں خلق خدا پکڑی گئی

آپ ہی کا آسرا ہے آپ کیجے گا مدد

حشر میں پرویںؔ اگر یا مصطفیٰ پکڑی گئی

dil ki chori mein jo chashm-e-surma sa pakri gai

wo tha chain-e-zulf mein ye be khata pakri gai

subh ku-e-yar mein bad-e-saba pakri gai

yaani ghibat mein gulon ki mubtala pakri gai

dil charha mushkil se taq-e-abru-e-kham-e-dar par

so jagah rasta mein jab zulf-e-rasa pakri gai

jan kar ankhen churaen tu ne ham se bazm mein

teri chori dekh li kya bad numa pakri gai

hai isi mein qalb-e-mahzon shartiyya kahta hun main

khol mutthi teri chori mah liqa pakri gai

mast ho kar us ki khushbu se gira tha bach gaya

jab sambhalne ko wo zulf-e-mushk sa pakri gai

har taraf sehn-e-chaman mein kahti phirti hai nasim

gul se hansti khulkhilati motiya pakri gai

apne hathon par liye phirte hain wo har dam-e-half

ar qasmon ki to mujh se barha pakri gai

rukh se gul ko tha taalluq zulf se sumbul ko mel

ek ja gantha use ye ek ja pakri gai

yar hai khanjar bakaf aur jan nisaron ka hujum

hae ye kis jurm mein khalq-e-khuda pakri gai

ap hi ka asra hai ap kije ga madad

hashr mein parwin agar ya mustafa pakri gai