دل کو آزار لگا وہ کہ چھپا بھی نہ سکوں

دل کو آزار لگا وہ کہ چھپا بھی نہ سکوں

پردہ وہ آ کے پڑا ہے کہ اٹھا بھی نہ سکوں

مدعا سامنے ان کے نہیں آتا لب تک

بات بھی کیا غم دل ہے کہ سنا بھی نہ سکوں

بے جگہ آنکھ لڑی دیکھیے کیا ہوتا ہے

آپ جا بھی نہ سکوں ان کو بلا بھی نہ سکوں

وہ دم نزع مرے بہر عیادت آئے

حال کب پوچھتے ہیں جب کہ سنا بھی نہ سکوں

زندگی بھی شب ہجراں ہے کہ کٹتی ہی نہیں

موت ہے کیا ترا آنا کہ بلا بھی نہ سکوں

دم ہے آنکھوں میں اسے جان میں لاؤں کیونکر

کب وہ آئے کہ انہیں ہاتھ لگا بھی نہ سکوں

شرم عصیاں نے جھکایا مری گردن کو ظہیرؔ

بوجھ وہ آ کے پڑا ہے کہ اٹھا بھی نہ سکوں

dil ko azar laga wo ke chhupa bhi na sakun

parda wo a ke para hai ke utha bhi na sakun

muddaa samne un ke nahin ata lab tak

bat bhi kya gham-e-dil hai ke suna bhi na sakun

be jagah ankh lari dekhiye kya hota hai

ap ja bhi na sakun un ko bala bhi na sakun

wo dam-e-nazaa mire bahr-e-ayadat ae

hal kab puchhte hain jab ke suna bhi na sakun

zindagi bhi shab-e-hijran hai ke katti hi nahin

maut hai kya tira ana ke bala bhi na sakun

dam hai ankhon mein use jan mein laun kyunkar

kab wo ae ke unhen hath laga bhi na sakun

sharm isyan ne jhukaya miri gardan ko zahir

bojh wo a ke para hai ke utha bhi na sakun