دل میں ہے غم و رنج و الم حرص و ہوا بند

دل میں ہے غم و رنج و الم حرص و ہوا بند

دنیا میں مخمس کا ہمارے نہ کھلا بند

ہم دام میں پھنستے ہی ہوئے عاشق صیاد

یہ اور بھی اک بند پہ مضبوط لگا بند

اے حضرت دل جائیے میرا بھی خدا ہے

بے آپ کے رہنے کا نہیں کام مرا بند

اے محتسب اک دم سے تری کتنی جفائیں

شیشے کا ہے دم بند صراحی کا گلا بند

دم رکتے ہی سینہ سے نکل پڑتے ہیں آنسو

بارش کی علامت ہے جو ہوتی ہے ہوا بند

کہتے تھے ہم اے داغؔ وہ کوچہ ہے خطرناک

چھپ چھپ کے مگر آپ کا جانا نہ ہوا بند

dil mein hai gham-o-ranj-o-alam hirs-o-hawa band

duniya mein mukhammas ka hamare na khula band

ham dam mein phanste hi hue ashiq sayyad

ye aur bhi ik band pe mazbut laga band

ai hazrat-e-dil jaiye mera bhi khuda hai

be ap ke rahne ka nahin kam mira band

ai mohtasib ik dam se tiri kitni jafaen

shishe ka hai dam band surahi ka gila band

dam rukte hi sina se nikal parte hain ansu

barish ki alamat hai jo hoti hai hawa band

kahte the ham ai dagh wo kucha hai khatarnak

chhup chhup ke magar ap ka jana na hua band