دل ٹھہرا ایک تبسم پر کچھ اور بہا اے جان نہیں

دل ٹھہرا ایک تبسم پر کچھ اور بہا اے جان نہیں

گر ہنس دیجے اور لے لیجے تو فائدہ ہے نقصان نہیں

یہ ناز ہے یا استغنا ہے یا طرز تغافل ہے یارو

جو لاکھ کوئی تڑپے سسکے فریاد کرے کچھ دھیان نہیں

جب سنتا ہے احوال مرا یوں کہتا ہے عیاری سے

ہے کون وہ اس سے ہم کو تو کچھ جان نہیں پہچان نہیں

کچھ بن نہیں آتا کیا کیجے کس طور سے ملیے اے ہمدم

وہ دیکھ ہمیں رک جاتا ہے اور ہم کو چین اک آن نہیں

تر دیکھ کے میری آنکھوں کو یہ بات سناتا ہے ہنس کر

ہیں کہتے جس کو چاہ میاں وہ مشکل ہے آسان نہیں

دل پھنس کر اس کی زلفوں میں تدبیر رہائی کی مت کر

کب چھوٹا اس کے دام سے تو وہ دانا ہے نادان نہیں

dil thahra ek tabassum par kuchh aur baha ai jan nahin

gar hans dije aur le lije to faida hai nuqsan nahin

ye naz hai ya istighna hai ya tarz-e-taghaful hai yaro

jo lakh koi tarpe siske fariyad kare kuchh dhyan nahin

jab sunta hai ahwal mira yun kahta hai ayyari se

hai kaun wo us se ham ko to kuchh jan nahin pahchan nahin

kuchh ban nahin ata kya kije kis taur se miliye ai hamdam

wo dekh hamen ruk jata hai aur ham ko chain ik an nahin

tar dekh ke meri ankhon ko ye bat sunata hai hans kar

hain kahte jis ko chah miyan wo mushkil hai asan nahin

dil phans kar us ki zulfon mein tadbir rihai ki mat kar

kab chhota us ke dam se to wo dana hai nadan nahin