دل و دماغ کو رو لوں گا آہ کر لوں گا

دل و دماغ کو رو لوں گا آہ کر لوں گا

تمہارے عشق میں سب کچھ تباہ کر لوں گا

اگر مجھے نہ ملیں تم تمہارے سر کی قسم

میں اپنی ساری جوانی تباہ کر لوں گا

مجھے جو دیر و حرم میں کہیں جگہ نہ ملی

ترے خیال ہی کو سجدہ گاہ کر لوں گا

جو تم سے کر دیا محروم آسماں نے مجھے

میں اپنی زندگی صرف گناہ کر لوں گا

رقیب سے بھی ملوں گا تمہارے حکم پہ میں

جو اب تلک نہ کیا تھا اب آہ کر لوں گا

تمہاری یاد میں میں کاٹ دوں گا حشر سے دن

تمہارے ہجر میں راتیں سیاہ کر لوں گا

ثواب کے لیے ہو جو گنہ وہ عین ثواب

خدا کے نام پہ بھی اک گناہ کر لوں گا

حریم حضرت سلمیٰ کی سمت جاتا ہوں

ہوا نہ ضبط تو چپکے سے آہ کر لوں گا

یہ نو بہار یہ ابرو، ہوا یہ رنگ شراب

چلو جو ہو سو ہو اب تو گناہ کر لوں گا

کسی حسینہ کے معصوم عشق میں اخترؔ

جوانی کیا ہے میں سب کچھ تباہ کر لوں گا

dil-o-dimagh ko ro lunga ah kar lunga

tumhare ishq mein sab kuchh tabah kar lunga

agar mujhe na milen tum tumhare sar ki qasam

main apni sari jawani tabah kar lunga

mujhe jo dair-o-haram mein kahin jagah na mili

tire khayal hi ko sajda gah kar lunga

jo tum se kar diya mahrum asman ne mujhe

main apni zindagi sirf-e-gunah kar lunga

raqib se bhi milunga tumhare hukm pe main

jo ab talak na kiya tha ab ah kar lunga

tumhari yad mein main kat dunga hashr se din

tumhare hijr mein raten siyah kar lunga

sawab ke liye ho jo gunah wo ain sawab

khuda ke nam pe bhi ik gunah kar lunga

harim-e-hazrat salmi ki samt jata hun

hawa na zabt to chupke se ah kar lunga

ye nau bahar ye abru, hua ye rang-e-sharab

chalo jo ho so ho ab to gunah kar lunga

kisi hasina ke maasum ishq mein akhtar

jawani kya hai main sab kuchh tabah kar lunga