دل میں کیا کیا ہوس دید بڑھائی نہ گئی

دل میں کیا کیا ہوس دید بڑھائی نہ گئی

روبرو ان کے مگر آنکھ اٹھائی نہ گئی

ہم رضا شیوہ ہیں تاویل ستم خود کر لیں

کیا ہوا ان سے اگر بات بنائی نہ گئی

یہ بھی آداب محبت نے گوارا نہ کیا

ان کی تصویر بھی آنکھوں سے لگائی نہ گئی

آہ وہ آنکھ جو ہر سمت رہی صاعقہ پاش

وہ جو مجھ سے کسی عنوان ملائی نہ گئی

ہم سے پوچھا نہ گیا نام و نشاں بھی ان کا

جستجو کی کوئی تمہید اٹھائی نہ گئی

دل کو تھا حوصلۂ عرض تمنا سو انہیں

سرگزشت شب ہجراں بھی سنائی نہ گئی

غم دوری نے کشاکش تو بہت کی لیکن

یاد ان کی دل حسرتؔ سے بھلائی نہ گئی

dil mein kya kya hawas-e-did barhai na gai

rubaru un ke magar ankh uthai na gai

ham raza shewa hain tawil-e-sitam khud kar len

kya hua un se agar bat banai na gai

ye bhi adab-e-mohabbat ne gawara na kiya

un ki taswir bhi ankhon se lagai na gai

ah wo ankh jo har samt rahi saiqa pash

wo jo mujh se kisi unwan milai na gai

ham se puchha na gaya nam-o-nishan bhi un ka

justuju ki koi tamhid uthai na gai

dil ko tha hausla-e-arz-e-tamanna so unhen

sarguzasht-e-shab-e-hijran bhi sunai na gai

gham-e-duri ne kashakash to bahut ki lekin

yad un ki dil-e-hasrat se bhalai na gai