دل غم سے ترے لگا گئے ہم

دل غم سے ترے لگا گئے ہم

کس آگ سے گھر جلا گئے ہم

ماتم کدۂ جہاں میں چوں شمع

رو رو کے جگر بہا گئے ہم

مانند حباب اس جہاں میں

کیا آئے تھے اور کیا گئے ہم

کھویا گیا اس میں گو دل اپنا

پر یار تجھے تو پا گئے ہم

آتا ہے یہی تو ہم کو رونا

یوں موت کا غم بھلا گئے ہم

افسانۂ سرگزشت چوں شمع

رو رو کے بہت سنا گئے ہم

تھا ہم میں اور اس میں وہ جو پردہ

سو اس کو حسنؔ اٹھا گئے ہم

dil gham se tire laga gae ham

kis ag se ghar jala gae ham

matam kada-e-jahan mein chun shama

ro ro ke jigar baha gae ham

manind-e-habab is jahan mein

kya ae the aur kiya gae ham

khoya gaya is mein go dil apna

par yar tujhe to pa gae ham

ata hai yahi to ham ko rona

yun maut ka gham bhala gae ham

afsana-e-sarguzasht chun shama

ro ro ke bahut suna gae ham

tha ham mein aur is mein wo jo parda

so us ko husn utha gae ham