دل سلامت اگر اپنا ہے تو دل دار بہت

دل سلامت اگر اپنا ہے تو دل دار بہت

ہے یہ وہ جنس کہ جس کے ہیں خریدار بہت

ایک میں ہی ترے کوچے میں نہیں ہوں بیتاب

سر پٹکتے ہیں خبر لے پس دیوار بہت

دیکھیے کس کے لگے ہاتھ ترا گوہر وصل

اس تمنا میں تو پھرتے ہیں طلب گار بہت

کہیں نرگس کو مگر تو نے دکھائیں آنکھیں

نہیں بچتے نظر آتے ہیں یہ بیمار بہت

کیا کروں کس سے کہوں حال کدھر کو جاؤں

تنگ آیا ہوں ترے ہاتھ سے دل دار بہت

اپنے عاشق سے کیا پوچھو تو کیسے یہ سلوک

اور بھی شہر میں ہیں تجھ سے طرحدار بہت

ترے آتے تو کوئی پھول نہ ہوگا سرسبز

کیا ہوا باغ میں گو پھولے تھے گل زار بہت

ایک دن تجھ کو دکھاؤں گا میں ان خوباں کو

دعویٔ یوسفی کرتے تو ہیں اظہار بہت

جرم بوسہ پہ جو بیدارؔ کو مارا مارا

نہ کرو جانے دو اس بات پہ تکرار بہت

dil salamat agar apna hai to dil dar bahut

hai ye wo jins ke jis ke hain kharidar bahut

ek main hi tire kuche mein nahin hun betab

sar patakte hain khabar le pas-e-diwar bahut

dekhiye kis ke lage hath tira gauhar wasl

is tamanna mein to phirte hain talab gar bahut

kahin nargis ko magar tu ne dikhaen ankhen

nahin bachte nazar ate hain ye bimar bahut

kya karun kis se kahun hal kidhar ko jaun

tang aya hun tire hath se dil dar bahut

apne ashiq se kiya puchho to kaise ye suluk

aur bhi shahr mein hain tujh se tarhdar bahut

tire ate to koi phul na hoga sarsabz

kya hua bagh mein go phule the gul zar bahut

ek din tujh ko dikhaunga mein un khuban ko

daawa-e-yusufi karte to hain izhar bahut

jurm-e-bosa pe jo bedar ko mara mara

na karo jane do is bat pe takrar bahut