دل سے پوچھا تو کہاں ہے تو کہا تجھ کو کیا — میر محمدی بیدار (Mir Mohammadi Bedar)

دل سے پوچھا تو کہاں ہے تو کہا تجھ کو کیا

کس کی زلفوں میں نہاں ہے تو کہا تجھ کو کیا

چشم گریاں سے شب وصل میں پوچھا میں نے

اب تو کیوں اشک فشاں ہے تو کہا تجھ کو کیا

جب کہا میں نے کہ نیں بولتے ہو گالی بن

جان یہ کون زباں ہے تو کہا تجھ کو کیا

کہنے لاگا دل گم گشتہ ترا ہے مجھ پاس

جب کہا میں نے کہاں ہے تو کہا تجھ کو کیا

جب کہا میں نے کہ اے جان تری صورت پر

شیفتہ پیر و جواں ہے تو کہا تجھ کو کیا

جب کہا میں نے کہ اے سرو ریاض خوبی

کس کا تو آفت جاں ہے تو کہا تجھ کو کیا

دل سے بیدارؔ نے پوچھا کہ ترے سینے پر

کس کے ناوک کا نشاں ہے تو کہا تجھ کو کیا