دل سے تری نگاہ جگر تک اتر گئی

دل سے تری نگاہ جگر تک اتر گئی

دونوں کو اک ادا میں رضامند کر گئی

شق ہو گیا ہے سینہ، خوشا لذّتِ فراغ

تکلیفِ پردہ داریِ زخمِ جگر گئی

وہ بادۂ شبانہ کی سر مستیاں کہاں

اٹھیے بس اب کہ لذّتِ خوابِ سحر گئی

اڑتی پھرے ہے خاک مری کوئے یار میں

بارے اب اے ہوا! ہوسِ بال و پر گئی

دیکھو تو دل فریبیِ اندازِ نقشِ پا

موجِ خرامِ یار بھی کیا گل کتر گئی

ہر بُو ‌الْہَوَس نے حسن پرستی شعار کی

اب آبروئے شیوہ اہلِ نظر گئی

نظّارے نے بھی کام کِیا واں نقاب کا

مستی سے ہر نگہ ترے رخ پر بکھر گئی

فردا و دی کا تفرِقہ یک بار مٹ گیا

کل تم گئے کہ ہم پہ قیامت گزر گئی

مارا زمانے نے اسدؔ اللہ خاں تمہیں

وہ ولولے کہاں وہ جوانی کدھر گئی

dil se tiri nigah jigar tak utar gai

donon ko ik ada mein razamand kar gai

shaqq ho gaya hai sina, khusha lazzat-e-faragh

taklif-e-parda dari-e-zakhm-e-jigar gai

wo bada-e-shabana ki sar mastiyan kahan

uthiye bas ab ke lazzat-e-khwab-e-sahar gai

urti phire hai khak miri ku-e-yar mein

bare ab ai hua! hawas-e-bal-o-par gai

dekho to dil farebi-e-andaz-e-naqsh-e-pa

mauj-e-khiram-e-yar bhi kya gul katar gai

har bu alhawas ne husn parasti shiar ki

ab abru-e-shewa-e-ahl-e-nazar gai

nazzare ne bhi kam kiya wan naqab ka

masti se har nigah tire rukh par bikhar gai

farda-o-di ka tafriqa yak bar mit gaya

kal tum gae ke ham pe qayamat guzar gai

mara zamane ne asad allah khan tumhen

wo walwale kahan wo jawani kidhar gai