بات دل کی زبان پر آئی

بات دل کی زبان پر آئی

آفت اب میری جان پر آئی

آرزو کیوں زبان پر آئی

ان کی زلف اڑ کے کان پر آئی

کھنچتے ہی اڑ گئی وہ بادہ فروش

چوکھی مے کب دکان پر آئی

ہو گئی اونچی ان کے بام سے آہ

آفت اب آسمان پر آئی

کی فرشتوں نے جب صراحت جرم

ہنسی ان کے بیان پر آئی

جب چلی آسماں سے کوئی بلا

سیدھی میرے مکان پر آئی

غیر کا ساز بن کے راز رہا

بات سب پاسبان پر آئی

روکے رکتا نہیں ہے سیل سرشک

اب تباہی مکان پر آئی

آئی بوتل بھی میکدے سے ریاضؔ

جب گھٹا آسمان پر آئی

bat dil ki zaban par ai

afat ab meri jan par ai

arzu kyun zaban par ai

un ki zulf ur ke kan par ai

khinchte hi ur gai wo bada farosh

chaukhi mai kab dukan par ai

ho gai unchi un ke bam se ah

afat ab asman par ai

ki farishton ne jab sarahat jurm

hansi un ke bayan par ai

jab chali asman se koi bala

sidhi mere makan par ai

ghair ka saz ban ke raz raha

bat sab pasban par ai

roke rukta nahin hai sail-e-sarishk

ab tabahi makan par ai

ai botal bhi maikade se riyaz

jab ghata asman par ai