خِرد نے مجھ کو عطا کی نظر حکیمانہ

خِرد نے مجھ کو عطا کی نظر حکیمانہ

سِکھائی عشق نے مجھ کو حدیثِ رِندانہ

نہ بادہ ہے، نہ صُراحی، نہ دورِ پیمانہ

فقط نگاہ سے رنگیں ہے بزمِ جانانہ

مری نوائے پریشاں کو شاعری نہ سمجھ

کہ مَیں ہوں محرمِ رازِ دُرونِ میخانہ

کلی کو دیکھ کہ ہے تشنۂ نسیمِ سحَر

اسی میں ہے مرے دل کا تمام افسانہ

کوئی بتائے مجھے یہ غیاب ہے کہ حضور

سب آشنا ہیں یہاں، ایک مَیں ہوں بیگانہ

فرنگ میں کوئی دن اور بھی ٹھہَر جاؤں

مرے جُنوں کو سنبھالے اگر یہ ویرانہ

مقامِ عقل سے آساں گزر گیا اقبالؔ

مقامِ شوق میں کھویا گیا وہ فرزانہ

khirad ne mujh ko ata ki nazar hakimana

sikhai ishq ne mujh ko hadis-e-rindana

na bada hai, na surahi, na daur-e-paimana

faqat nigah se rangin hai bazm-e-janana

miri nawa-e-pareshan ko shayari na samajh

ke main hun mahram-e-raz-e-durun-e-maikhana

kali ko dekh ke hai tishna-e-nasim-e-sahar

isi mein hai mire dil ka tamam afsana

koi batae mujhe ye ghiyab hai ke huzur

sab ashna hain yahan, ek main hun begana

farang mein koi din aur bhi thahar jaun

mire junun ko sambhale agar ye wirana

maqam-e-aql se asan guzar gaya iqbal

maqam-e-shauq mein khoya gaya wo farzana