دامن صبا نہ چھو سکے جس شہ سوار کا

دامن صبا نہ چھو سکے جس شہ سوار کا

پہنچے کب اس کو ہاتھ ہمارے غبار کا

موج نسیم آج ہے آلودہ گرد سے

دل خاک ہو گیا ہے کسی بے قرار کا

خون جگر شراب و ترشح ہے چشم تر

ساغر مرا گرو نہیں ابر بہار کا

چشم کرم سے عاشق وحشی اسیر ہو

الفت ہے دام آہوئے دل کے شکار کا

سونپا تھا کیا جنوں نے گریبان کو مرے

لیتا ہے اب حساب جو یہ تار تار کا

سوداؔ شراب عشق نہ کہتے تھے ہم، نہ پی

پایا مزا نہ تو نے اب اس کے خمار کا

daman saba na chhu sake jis shah sawar ka

pahunche kab us ko hath hamare ghubar ka

mauj-e-nasim aj hai aluda gard se

dil khak ho gaya hai kisi be qarar ka

khun-e-jigar sharab-o-tarashshoh hai chashm-e-tar

saghar mira giro nahin abr-e-bahar ka

chashm-e-karam se ashiq-e-wahshi asir ho

ulfat hai dam-e-ahu-e-dil ke shikar ka

saunpa tha kya junun ne gareban ko mire

leta hai ab hisab jo ye tar tar ka

sauda sharab-e-ishq na kahte the ham, na pi

paya maza na tu ne ab us ke khumar ka