بات میری کبھی سنی ہی نہیں

بات میری کبھی سنی ہی نہیں

جانتے وہ بری بھلی ہی نہیں

دل لگی ان کی دل لگی ہی نہیں

رنج بھی ہے فقط ہنسی ہی نہیں

لطف مے تجھ سے کیا کہوں زاہد

ہائے کم بخت تو نے پی ہی نہیں

اڑ گئی یوں وفا زمانے سے

کبھی گویا کسی میں تھی ہی نہیں

جان کیا دوں کہ جانتا ہوں میں

تم نے یہ چیز لے کے دی ہی نہیں

ہم تو دشمن کو دوست کر لیتے

پر کریں کیا تری خوشی ہی نہیں

ہم تری آرزو پہ جیتے ہیں

یہ نہیں ہے تو زندگی ہی نہیں

دل لگی دل لگی نہیں ناصح

تیرے دل کو ابھی لگی ہی نہیں

داغؔ کیوں تم کو بے وفا کہتا

وہ شکایت کا آدمی ہی نہیں

bat meri kabhi suni hi nahin

jante wo buri bhali hi nahin

dil lagi un ki dil lagi hi nahin

ranj bhi hai faqat hansi hi nahin

lutf-e-mai tujh se kya kahun zahid

hae kam bakht tu ne pi hi nahin

ur gai yun wafa zamane se

kabhi goya kisi mein thi hi nahin

jan kya dun ke janta hun main

tum ne ye chiz le ke di hi nahin

ham to dushman ko dost kar lete

par karen kya tiri khushi hi nahin

ham tiri arzu pe jite hain

ye nahin hai to zindagi hi nahin

dil lagi dil lagi nahin naseh

tere dil ko abhi lagi hi nahin

dagh kyun tum ko be wafa kahta

wo shikayat ka admi hi nahin