خاک عاشق ہے جو ہووے ہے نثار دامن — میر محمدی بیدار (Mir Mohammadi Bedar)

خاک عاشق ہے جو ہووے ہے نثار دامن

اے مری جان تو مت جھاڑ غبار دامن

دوستو مجھ کو نہ دو سیر چمن کی تکلیف

اشک ہی بس ہے مرا باغ و بہار دامن

سرخ جامہ پہ نہیں تیرے کناری کی چمک

برق اس ابر میں ہوتی ہے نثار دامن

دیکھتا کیا ہے گریباں کہ جنون سے ناصح

یاں تو ثابت نہ رہا ایک بھی تار دامن

آستیں تک تو کہاں اس کے رسائی بیدارؔ

دسترس مجھ کو نہیں تا بہ کنار دامن