جور کے بعد ہے کیوں لطف یہ عادت کیا ہے

جور کے بعد ہے کیوں لطف یہ عادت کیا ہے

تم تلافی جو کرو اس کی ضرورت کیا ہے

ایک دن مان ہی جاؤ گے ہمارا کہنا

تم کہے جاؤ یہی تیری حقیقت کیا ہے

وعدہ وصل سے انکار ہے تو قتل کرو

تم سے ہم پوچھتے ہیں اس میں قباحت کیا ہے

بوسہ مانگا تو کہا اس نے بدل کر چتون

آپ کو یہ بھی خبر ہے مری عادت کیا ہے

ہائے کیا تھا وہ زمانہ کہ تم آگاہ نہ تھے

شکر کس چیز کو کہتے ہیں شکایت کیا ہے

کیا کہوں کس سے کہوں دل کی حقیقت اے داغؔ

سب یہی پوچھتے ہیں کہئے تو حضرت کیا ہے

jaur ke baad hai kyun lutf ye adat kya hai

tum talafi jo karo us ki zarurat kya hai

ek din man hi jaoge hamara kahna

tum kahe jao yahi teri haqiqat kya hai

waada wasl se inkar hai to qatl karo

tum se ham puchhte hain is mein qabahat kya hai

bosa manga to kaha us ne badal kar chitwan

ap ko ye bhi khabar hai miri adat kya hai

hae kya tha wo zamana ke tum agah na the

shukr kis chiz ko kahte hain shikayat kya hai

kya kahun kis se kahun dil ki haqiqat ai dagh

sab yahi puchhte hain kahiye to hazrat kya hai