جوش جنوں میں رات دن سب سے رہا الگ الگ

جوش جنوں میں رات دن سب سے رہا الگ الگ

میں ہوں جدا الگ الگ لوگ جدا الگ الگ

میں نے بلائیں لینے کو ہاتھ بڑھائے جب ادھر

منہ کو پھرا کے یار نے مجھ سے کہا الگ الگ

شمع جلانے آئے ہیں آج وہ میری قبر پر

چلیو خدا کے واسطے باد صبا الگ الگ

خاک ہو زندگی بھلا تیرے مریض عشق کی

میں ہوں دوا سے دور دور مجھ سے دوا الگ الگ

ہجر میں خوب خاک اڑی ان کو ہوا نہ کچھ اثر

نالہ گئے الگ الگ آہ رسا الگ الگ

حسرت و آرزوئے وصل درد و مصیبت فراق

سب کا ہے لطف الگ الگ سب کا مزہ الگ الگ

صدرؔ وہ کم نصیب ہوں ہجر میں گر اٹھاؤں ہاتھ

باب قبول سے رہے میری دعا الگ الگ

josh-e-junun mein rat din sab se raha alag alag

main hun juda alag alag log juda alag alag

main ne balaen lene ko hath barhae jab idhar

munh ko phira ke yar ne mujh se kaha alag alag

shama jalane ae hain aj wo meri qabr par

chaliyo khuda ke waste bad-e-saba alag alag

khak ho zindagi bhala tere mariz-e-ishq ki

main hun dawa se dur dur mujh se dawa alag alag

hijr mein khub khak uri un ko hua na kuchh asar

nala gae alag alag ah-e-rasa alag alag

hasrat-o-arzu-e-wasl dard-o-musibat-e-firaq

sab ka hai lutf alag alag sab ka maza alag alag

sadr wo kam nasib hun hijr mein gar uthaun hath

bab-e-qubul se rahe meri dua alag alag