جو کہتے ہو چلیں ہم بھی ترے ہم راہ بسم اللہ — نظیر اکبر آبادی (Nazeer Akbarabadi)

جو کہتے ہو چلیں ہم بھی ترے ہم راہ بسم اللہ

پھر اس میں دیر کیا اور پوچھنا کیا واہ بسم اللہ

قدم اس ناز سے رکھتا ہوا آتا ہے محفل میں

کہ اہل بزم سب کہتے ہیں بسم اللہ بسم اللہ

لگائی اس نے جو جو تیغ ابرو کی مرے دل پر

لب ہر زخم سے نکلی بجائے آہ بسم اللہ

شب مہ میں جو کل ٹک ڈگمگایا وہ تو سب انجم

وہیں بولے خدا حافظ پکارا ماہ بسم اللہ

وہ جس دم نسخۂ ناز و ادا آغاز کرتا ہے

تو ہم کہتے ہیں اک اک آن پر واللہ بسم اللہ

جو اس کی چاہ کا جی میں ارادہ ہے تو بس اے دل

مبارک ہے تجھے جا شوق سے تو چاہ بسم اللہ

نظیرؔ اس دل ربا محبوب چنچل سے لگا کر دل

ہمیں کہنا پڑا ہے دم بہ دم اللہ بسم اللہ