جو ہم آئے تو بوتل کیوں الگ پیر مغاں رکھ دی
Riyaz Khairabadi (1853–1934)جو ہم آئے تو بوتل کیوں الگ پیر مغاں رکھ دی
پرانی دوستی بھی طاق پر اے مہرباں رکھ دی
قفس میں شاخ گل صیاد نے اے آسماں رکھ دی
بنا کر شاخ گل ہاں تیری شاخ کہکشاں رکھ دی
یہ کیسی آگ بھر کر جام میں پیر مغاں رکھ دی
جو توڑی مہر ساغر سے تو کچھ اٹھا دھواں رکھ دی
ذرا چھیڑا جو اس نے ہو گئی ایسی زخود رفتہ
کہ شمع بزم نے گلگیر کے لب پر زباں رکھ دی
خدا کے ہاتھ ہے بکنا نہ بکنا مے کا اے ساقی
برابر مسجد جامع کے ہم نے اب دکاں رکھ دی
چمن کا لطف آتا ہے مجھے صیاد کے صدقے
قفس میں لا کے اس نے آج شاخ آشیاں رکھ دی
بنا ہے ایک ہی دونوں کی کعبہ ہو کہ بت خانہ
اٹھا کر خشت خم میں نے وہاں رکھ دی یہاں رکھ دی
یہ قیس و کوہ کن کے سے فسانے بن گئے کتنے
کسی نے ٹکڑے ٹکڑے سب ہماری داستاں رکھ دی
تعین سے منزہ شوخیاں ہیں اس کے جلوے کی
ہماری وسعت دل میں بنائے لا مکاں رکھ دی
نظر مدت سے تھی اے شیخ جس پر مے فروشوں کی
وہ دستار فضیلت رہین ہم نے مہرباں رکھ دی
یہ کیا تھا جلوہ ان کا دیکھنا تھا ہم کو پردے میں
لگا کر آنکھ سے ہم نے جو تصویر بتاں رکھ دی
یہ عالم ہے ریاضؔ ایک ایک قطرے کو ترستا ہوں
حرم میں اب بھری بوتل خدا جانے کہاں رکھ دی
jo ham ae to botal kyun alag pir-e-mughan rakh di
purani dosti bhi taq par ai mehrban rakh di
qafas mein shakh-e-gul sayyad ne ai asman rakh di
bana kar shakh-e-gul han teri shakh-e-kahkashan rakh di
ye kaisi ag bhar kar jam mein pir-e-mughan rakh di
jo tori mehr saghar se to kuchh utha dhuan rakh di
zara chhera jo us ne ho gai aisi zikhud rafta
ke sham-e-bazm ne gulgir ke lab par zaban rakh di
khuda ke hath hai bikna na bikna mai ka ai saqi
barabar masjid-e-jame ke ham ne ab dukan rakh di
chaman ka lutf ata hai mujhe sayyad ke sadqe
qafas mein la ke us ne aj shakh-e-ashiyan rakh di
bana hai ek hi donon ki kaaba ho ke but khana
utha kar khisht-e-kham main ne wahan rakh di yahan rakh di
ye qais-o-koh kin ke se fasane ban gae kitne
kisi ne tukre tukre sab hamari dastan rakh di
taayyun se munazza shokhiyan hain us ke jalwe ki
hamari wusat-e-dil mein banae la makan rakh di
nazar muddat se thi ai shaikh jis par mai faroshon ki
wo dastar-e-fazilat rahin ham ne mehrban rakh di
ye kya tha jalwa un ka dekhna tha ham ko parde mein
laga kar ankh se ham ne jo taswir-e-butan rakh di
ye alam hai riyaz ek ek qatre ko tarasta hun
haram mein ab bhari botal khuda jane kahan rakh di