جو ہاتھ اپنے سبزے کا گھوڑا لگا

جو ہاتھ اپنے سبزے کا گھوڑا لگا

تو سلفے کا اور اس کو کوڑا لگا

مرے ہی جو بازو میں اک نیل سا

سو تیرے ہے پاؤں کا توڑا لگا

اجی چشم بد دور نام خدا

تمہیں کیا بھلا سرخ جوڑا لگا

بھلا آپ شرمائے کس واسطے

کبوتر کا باہم جو جوڑا لگا

یہ دکھتی نگاہوں سے گھورا مجھے

کہ دکھنے مرے دل کا پھوڑا لگا

لگی کہنے انشاؔ کو شب وہ پری

مجھے بھوت ہو یہ نگوڑا لگا

jo hath apne sabze ka ghora laga

tu sulfe ka aur us ko kora laga

mire hi jo bazu mein ik nil sa

so tere hai paon ka tora laga

aji chashm-e-bad dur nam-e-khuda

tumhen kya bhala surkh jora laga

bhala ap sharmae kis waste

kabutar ka baham jo jora laga

ye dikhti nigahon se ghora mujhe

ke dikhne mire dil ka phora laga

lagi kahne insha ko shab wo pari

mujhe bhut ho ye nigora laga