جی چاہتا ہے شیخ کہ پگڑی اتارئیے

جی چاہتا ہے شیخ کہ پگڑی اتارئیے

اور تان کر چٹاخ سے ایک دھول ماریے

سوتوں کو پچھلے پہر بھلا کیوں پکاریے

دروازہ کھلنے کا نہیں گھر کو سدھاریے

کیا سرو اکڑ رہا ہے کھڑا جوئبار پر

ٹک آپ بھی تو اس گھڑی سینہ ابھارئے

یہ کارخانہ دیکھیے ٹک آپ دھیان سے

بس سون کھینچ جائے یہاں دم نہ ماریے

ناصح نے میرے حق میں کہا اہل بزم سے

بگڑی ہوئی کو آہ کہاں تک سنوارئیے

انشاؔ خدا کے فضل پہ رکھیے نگاہ اور

دن ہنس کے کاٹ ڈالئے ہمت نہ ہاریے

ji chahta hai shaikh ke pagri utariye

aur tan kar chatakh se ek dhul mariye

soton ko pichhle pahar bhala kyun pukariye

darwaza khulne ka nahin ghar ko sidhariye

kya sarw akkar raha hai khara joibar par

tuk ap bhi to us ghari sina ubhariye

ye karkhana dekhiye tuk ap dhyan se

bas suwun khinch jae yahan dam na mariye

naseh ne mere haq mein kaha ahl-e-bazm se

bigri hui ko ah kahan tak sanwariye

insha khuda ke fazl pe rakhiye nigah aur

din hans ke kat daliye himmat na hariye