جو چار آدمیوں میں گناہ کرتے ہیں

جو چار آدمیوں میں گناہ کرتے ہیں

خدا کی دی ہوئی عزت تباہ کرتے ہیں

بتوں کے ہوتے جو مہ پر نگاہ کرتے ہیں

قسم خدا کی بڑا ہی گناہ کرتے ہیں

بڑا ہی ظلم خدا کی پناہ کرتے ہیں

ہم آہ آہ تو وہ واہ واہ کرتے ہیں

وہ بوسہ دیتے نہیں گورے گورے گالوں کا

تمہیں گواہ ہم اے مہر و ماہ کرتے ہیں

بتو تمہیں پہ فدا ہیں بتو تمہیں پہ نثار

یقیں نہ ہو تو خدا کو گواہ کرتے ہیں

کبھی وہ دیکھتے ہیں اپنے تیغ و بازو کو

کبھی وہ غیظ سے مجھ پر نگاہ کرتے ہیں

مجال کیا ہے جو لوں نام اپنے قاتل کا

تمہیں پہ لوگ مگر اشتباہ کرتے ہیں

خیال رکھتے ہیں ہر وقت دوستی کا شریف

اسی طرح سے ہمیشہ نباہ کرتے ہیں

گناہ کیا ہے جو دل سے عزیز رکھتے ہیں

بنے ہو یوسف ثانی تو چاہ کرتے ہیں

اگر ہو صبر و قناعت کی دولت اے پرویںؔ

گدا بھی کرتے ہیں وہ ہی جو شاہ کرتے ہیں

jo char admiyon mein gunah karte hain

khuda ki di hui izzat tabah karte hain

buton ke hote jo mah par nigah karte hain

qasam khuda ki bara hi gunah karte hain

bara hi zulm khuda ki panah karte hain

ham ah ah to wo wah wah karte hain

wo bosa dete nahin gore gore galon ka

tumhen gawah ham ai mehr-o-mah karte hain

buto tumhen pe fida hain buto tumhen pe nisar

yaqin na ho to khuda ko gawah karte hain

kabhi wo dekhte hain apne tegh-o-bazu ko

kabhi wo ghaiz se mujh par nigah karte hain

majal kya hai jo lun nam apne qatil ka

tumhen pe log magar ishtibah karte hain

khayal rakhte hain har waqt dosti ka sharif

isi tarah se hamesha nibah karte hain

gunah kya hai jo dil se aziz rakhte hain

bane ho yusuf-e-sani to chah karte hain

agar ho sabr-o-qanaat ki daulat ai parwin

gada bhi karte hain wo hi jo shah karte hain