ایک مدت سے طلب گار ہوں کن کا ان کا

ایک مدت سے طلب گار ہوں کن کا ان کا

تشنۂ حسرت دیدار ہوں کن کا ان کا

جان کو بیچ کے یہ نقد دل اب لایا ہوں

سب سے پہلے میں خریدار ہوں کن کا ان کا

امتداد اس مرے بیمار کا مت پوچھ طبیب

روز میثاق سے بیمار ہوں کن کا ان کا

مخلصی قید سے مشکل ہے مجھے تا دم مرگ

دام الفت میں گرفتار ہوں کن کا ان کا

بود و باش اپنا بتاؤں میں تمہیں کیا یارو

ساکن سایۂ دار ہوں کن کا ان کا

ہے بجا فخر کروں اپنی اگر تالا پر

کفش برداروں کا سردار ہوں کن کا ان کا

گالیاں تجھ کو جو دیتے ہیں یہ حاتمؔ ہیں کون

کچھ نہ پوچھو میں گنہ گار ہوں کن کا ان کا

تو سزا وار سزا کس کا ہوا ہے حاتمؔ

صاحب من میں گنہ گار ہوں کن کا ان کا

ek muddat se talab gar hun kin ka un ka

tishna-e-hasrat-e-didar hun kin ka un ka

jan ko bech ke ye naqd-e-dil ab laya hun

sab se pahle main kharidar hun kin ka un ka

imtidad is mire bimar ka mat puchh tabib

roz-e-misaq se bimar hun kin ka un ka

makhlasi qaid se mushkil hai mujhe ta dam-e-marg

dam-e-ulfat mein giraftar hun kin ka un ka

bud-o-bash apna bataun main tumhen kya yaro

sakin saya-e-dar hun kin ka un ka

hai baja fakhr karun apni agar tala par

kafsh bardaron ka sardar hun kin ka un ka

galiyan tujh ko jo dete hain ye hatim hain kaun

kuchh na puchho mein gunah gar hun kin ka un ka

tu saza war saza kis ka hua hai hatim

sahab-e-man mein gunah gar hun kin ka un ka