جس نے تری بے باک ادا کو نہیں دیکھا

جس نے تری بے باک ادا کو نہیں دیکھا

واللہ کہ آنکھوں سے فضا کو نہیں دیکھا

کیوں مجھ کو سنائے نہ بھلا قصہ جنت

واعظ نے ترے مہر و وفا کو نہیں دیکھا

افسوس کہ سن ہی کے ابھی ہنستے ہو افسوس

تم نے جو اگر آہ و بکا کو نہیں دیکھا

گھبرائے ہوئے پھرتی ہے کیوں میرے طرح سے

تاثیر نے کیا میری دعا کو نہیں دیکھا

بیباکیاں دیکھیں ہیں تری بزم عدو میں

آنکھوں میں تری شرم و حیا کو نہیں دیکھا

کہتے ہیں غلط ہووے گا دشمن کا گزر خاک

کوچے میں ترے باد صبا کو نہیں دیکھا

معلوم نہیں تم کو وفا کہتے ہیں کس کو

تم نے ابھی ارباب وفا کو نہیں دیکھا

کیا خاک ہو امید مجھے اس سے وفا کی

میں نے تو کبھی اس کی جفا کو نہیں دیکھا

نازاں نہ ہوں کیوں خضر بھلا عمر پہ اپنی

حضرت نے ترا زلف رسا کو نہیں دیکھا

پردے سے نکلتے نہیں اور کہتے ہیں مجھ سے

پہچانو گے کیا ہم کو خدا کو نہیں دیکھا

آگے تری آنکھوں کے جھکائے ہوئے آنکھیں

کب آہوئے باور بہ خطا کو نہیں دیکھا

کیوں حضرت موسیٰ کی طرح نعش میں نساخؔ

گر تم نے بت ہوش ربا کو نہیں دیکھا

jis ne tiri be bak ada ko nahin dekha

wallah ke ankhon se faza ko nahin dekha

kyun mujh ko sunae na bhala qissa jannat

waiz ne tire mehr-o-wafa ko nahin dekha

afsos ke sun hi ke abhi hanste ho afsos

tum ne jo agar ah-o-buka ko nahin dekha

ghabrae hue phirti hai kyun mere tarah se

tasir ne kya meri dua ko nahin dekha

bebakiyan dekhen hain tiri bazm-e-adu mein

ankhon mein tiri sharm-o-haya ko nahin dekha

kahte hain ghalat howe ga dushman ka guzar khak

kuche mein tire bad-e-saba ko nahin dekha

maalum nahin tum ko wafa kahte hain kis ko

tum ne abhi arbab-e-wafa ko nahin dekha

kya khak ho ummid mujhe us se wafa ki

main ne to kabhi us ki jafa ko nahin dekha

nazan na hun kyun khizr bhala umr pe apni

hazrat ne tira zulf-e-rasa ko nahin dekha

parde se nikalte nahin aur kahte hain mujh se

pahchanoge kya ham ko khuda ko nahin dekha

age tiri ankhon ke jhukae hue ankhen

kab ahu-e-bawar ba khata ko nahin dekha

kyun hazrat-e-musa ki tarah naash mein nassakh

gar tum ne but hosh ruba ko nahin dekha