جسے پالا تھا اک مدت تک آغوش تمنا میں

جسے پالا تھا اک مدت تک آغوش تمنا میں

وہی بانی ہوا میرے غم و درد و اذیت کا

اسی کے ہاتھ سے کیا کیا سہا سہنا ہے کیا کیا کچھ

الٰہی دو جہاں میں منہ ہو کالا اس مروت کا

کریں انصاف کا دعویٰ اثر کچھ بھی نہ ظاہر ہو

مزا چکھا ہے ایسے دوستوں سے بھی محبت کا

مٹائیں تاکہ اپنے ظلم کرنے کی ندامت کو

نکالیں ڈھونڈ کر ہر طرح سے پہلو شکایت کا

حسد جی میں بھرا ہے لاگ ہے اک عمر سے دل میں

کریں ظاہر اگر موقع ہے اظہار عداوت کا

طمع میں کچھ نہ سمجھیں باپ اور بھائی کی حرمت کو

عمل دیکھو تو یہ پھر کچھ کریں دعوا شرافت کا

مری عمر دو روزہ بیکسی کے ساتھ کٹتی ہے

نہ اپنوں سے نہ غیروں سے ملا ثمرہ ریاضت کا

جسے دیکھا جسے پایا غرض کا اپنی بندہ تھا

جہاں میں اب مزا باقی نہیں خالص محبت کا

ہمارا کلبۂ احزاں ہے ہم ہیں یا کتابیں ہیں

رہا باقی نہ کوئی ہم نشیں اب اپنی قسمت کا

خدا آباد رکھے شادؔ میرے ان عزیزوں کو

مزا چکھوا دیا القرض مقراض المحبت کا

jise pala tha ik muddat tak aghosh-e-tamanna mein

wahi bani hua mere gham-o-dard-o-aziyyat ka

usi ke hath se kya kya saha sahna hai kya kya kuchh

ilahi do jahan mein munh ho kala is murawwat ka

karen insaf ka daawa asar kuchh bhi na zahir ho

maza chakha hai aise doston se bhi mohabbat ka

mitaen take apne zulm karne ki nadamat ko

nikalen dhund kar har tarah se pahlu shikayat ka

hasad ji mein bhara hai lag hai ik umr se dil mein

karen zahir agar mauqaa hai izhar-e-adawat ka

tamaa mein kuchh na samjhen bap aur bhai ki hurmat ko

amal dekho to ye phir kuchh karen daawa sharafat ka

miri umr do roza bekasi ke sath katti hai

na apnon se na ghairon se mila samara riyazat ka

jise dekha jise paya gharaz ka apni banda tha

jahan mein ab maza baqi nahin khalis mohabbat ka

hamara kulba-e-ahzan hai ham hain ya kitaben hain

raha baqi na koi ham nashin ab apni qismat ka

khuda abad rakhe shad mere in azizon ko

maza chakhwa diya alqarz miqraz almohabbat ka