ایک پرندہ اور جگنو

سرِ شام ایک مرغِ نغمہ پیرا

کسی ٹہنی پہ بیٹھا گا رہا تھا

چمکتی چیز اک دیکھی زمیں پر

اُڑا طائر اُسے جُگنو سمجھ کر

کہا جُگنو نے او مرغِ نواریز!

نہ کر بے کس پہ منقارِ ہوس تیز

تجھے جس نے چہک، گُل کو مہک دی

اُسی اللہ نے مجھ کو چمک دی

لباسِ نور میں مستور ہوں میں

پتنگوں کے جہاں کا طُور ہوں میں

چہک تیری بہشتِ گوش اگر ہے

چمک میری بھی فردوسِ نظر ہے

پروں کو میرے قُدرت نے ضیا دی

تجھے اُس نے صدائے دل رُبا دی

تری منقار کو گانا سکھایا

مجھے گُلزار کی مشعل بنایا

چمک بخشی مجھے، آواز تجھ کو

دیا ہے سوز مجھ کو، ساز تجھ کو

مخالف ساز کا ہوتا نہیں سوز

جہاں میں ساز کا ہے ہم نشیں سوز

قیامِ بزمِ ہستی ہے انھی سے

ظہورِ اوج و پستی ہے انھی سے

ہم آہنگی سے ہے محفل جہاں کی

اسی سے ہے بہار اس بوستاں کی

sar-e-sham ek murgh-e-naghma paira

kisi tahni pe baitha ga raha tha

chamakti chiz ik dekhi zamin par

ura tair use jugnu samajh kar

kaha jugnu ne o murgh-e-nawarez!

na kar be kis pe minqar-e-hawas tez

tujhe jis ne chahak, gul ko mahak di

usi allah ne mujh ko chamak di

libas-e-nur mein mastur hun main

patangon ke jahan ka tur hun main

chahak teri bahisht-e-gosh agar hai

chamak meri bhi firdaus-e-nazar hai

paron ko mere qudrat ne ziya di

tujhe us ne sada-e-dil ruba di

tiri minqar ko gana sikhaya

mujhe gulzar ki mashal banaya

chamak bakhshi mujhe, awaz tujh ko

diya hai soz mujh ko, saz tujh ko

mukhalif saz ka hota nahin soz

jahan mein saz ka hai ham nashin soz

qayam-e-bazm-e-hasti hai unhi se

zuhur-e-auj-o-pasti hai unhi se

ham ahangi se hai mahfil jahan ki

usi se hai bahar is bostan ki