جس زخم کی ہو سکتی ہو تدبیر رفو کی

جس زخم کی ہو سکتی ہو تدبیر رفو کی

لکھ دیجیو یا رب اسے قسمت میں عدو کی

اچّھا ہے سر انگشتِ حنائی کا تصوّر

دل میں نظر آتی تو ہے اک بوند لہو کی

کیوں ڈرتے ہو عشّاق کی بے حوصلگی سے

یاں تو کوئی سنتا نہیں فریاد کسو کی

اے بے خبراں! میرے لبِ زخمِ جگر پر

بخیہ جسے کہتے ہو شکایت ہے رفو کی

گو زندگیِ زاہدِ بے چارہ عبث ہے

اتنا تو ہے، رہتی تو ہے تدبیر وضو کی

دشنے نے کبھی منہ نہ لگایا ہو جگر کو

خنجر نے کبھی بات نہ پوچھی ہو گلو کی

صد حیف وہ نا کام کہ اک عمر سے غالبؔ

حسرت میں رہے ایک بتِ عربدہ جو کی

jis zakhm ki ho sakti ho tadbir rafu ki

likh dijiyo ya rab use qismat mein adu ki

achchha hai sar angishat-e-hinai ka tasawwur

dil mein nazar ati to hai ik bund lahu ki

kyun darte ho ushshaq ki be hauslagi se

yan to koi sunta nahin fariyad kisu ki

ai be khabaran! mere lab-e-zakhm-e-jigar par

bakhiya jise kahte ho shikayat hai rafu ki

go zindagi-e-zahid-e-be chara abas hai

itna to hai, rahti to hai tadbir wuzu ki

dashne ne kabhi munh na lagaya ho jigar ko

khanjar ne kabhi bat na puchhi ho galo ki

sad haif wo na kam ke ik umr se ghalib

hasrat mein rahe ek but-e-arbada jo ki