جب کسی نے حال پوچھا رو دیا

جب کسی نے حال پوچھا رو دیا

چشم تر تو نے تو مجھ کو کھو دیا

داغ ہو یا سوز ہو یا درد و غم

لے لیا خوش ہو کے جس نے جو دیا

اشک ریزی کے دھڑلے نے غبار

جب ذرا بھی دل پہ دیکھا دھو دیا

دل کی پروا تک نہیں اے بے خودی

کیا کیا پھینکا کہاں کس کو دیا

کچھ نہ کچھ اس انجمن میں حسب حال

تو نے قسام ازل سب کو دیا

کشت دنیا کیا خبر کیا پھل ملے

تخم غم ہم نے تو آ کر بو دیا

یہ بھی نشہ مے کشو کچھ کم نہیں

دے نہ دے ساقی پہ تم سمجھو دیا

شادؔ کے آگے بھلا کیا ذکر یار

نام ادھر آیا کہ اس نے رو دیا

زمرۂ اہل قلم میں لکھ کے نام

خود کو ناحق شادؔ تو نے کھو دیا

jab kisi ne hal puchha ro diya

chashm-e-tar tu ne to mujh ko kho diya

dagh ho ya soz ho ya dard-o-gham

le liya khush ho ke jis ne jo diya

ashk rezi ke dharalle ne ghubar

jab zara bhi dil pe dekha dho diya

dil ki parwa tak nahin ai be khudi

kya kiya phenka kahan kis ko diya

kuchh na kuchh is anjuman mein hasb-e-hal

tu ne qisum-e-azal sab ko diya

kisht-e-duniya kya khabar kya phal mile

tukhm-e-gham ham ne to a kar bu diya

ye bhi nasha mai kasho kuchh kam nahin

de na de saqi pe tum samjho diya

shad ke age bhala kya zikr-e-yar

nam idhar aya ke us ne ro diya

zumra-e-ahl-e-qalam mein likh ke nam

khud ko nahaq shad tu ne kho diya