ایک ہم سے تجھے نہیں اخلاص

ایک ہم سے تجھے نہیں اخلاص

گھر بہ گھر تجھ کو ہر کہیں اخلاص

رو سیاہی سوا نہیں حاصل

نام سے مت کر اے نگیں اخلاص

دیکھ تجھ زلف و رو کی الفت کو

کرتے ہیں آج کفر و دیں اخلاص

زور ہی ہم سے تیں رکھا پیارے

واہ وا رحمت آفریں اخلاص

مثل نقش قدم یہ رکھتی ہے

تیرے در سے مری جبیں اخلاص

گر تمنا گہر کی ہے تو کر

چشم میری سے آستیں اخلاص

آدم اس دام میں پھنسا سوداؔ

رکھے دانے سے خوشہ چیں اخلاص

ek ham se tujhe nahin ikhlas

ghar ba ghar tujh ko har kahin ikhlas

ro siyahi siwa nahin hasil

nam se mat kar ai nagin ikhlas

dekh tujh zulf-o-ro ki ulfat ko

karte hain aj kufr-o-din ikhlas

zor hi ham se tin rakha pyare

wah wa rahmat afrin ikhlas

misl-e-naqsh-e-qadam ye rakhti hai

tere dar se miri jabin ikhlas

gar tamanna guhar ki hai to kar

chashm meri se astin ikhlas

adam is dam mein phansa sauda

rakhe dane se khosha chin ikhlas