جب کبھی دریا میں ہوتے سایہ افگن آپ ہیں

جب کبھی دریا میں ہوتے سایہ افگن آپ ہیں

فلس ماہی کو بتاتے ماہ روشن آپ ہیں

سیتے ہیں سوزن سے چاک سینہ کیا اے چارہ ساز

خار غم سینے میں اپنے مثل سوزن آپ ہیں

پیار سے کر کے حمائل غیر کی گردن میں ہاتھ

مارتے تیغ ستم سے مجھ کو گردن آپ ہیں

کھینچ کر آنکھوں میں اپنی سرمۂ دنبالہ دار

کرتے پیدا سحر سے نرگس میں سوسن آپ ہیں

دیکھ کر صحرا میں مجھ کو پہلے گھبرایا تھا قیس

پھر جو پہچانا تو بولا حضرت من آپ ہیں

جی دھڑکتا ہے کہیں تار رگ گل چبھ نہ جائے

سیج پر پھولوں کی کرتے قصد خفتن آپ ہیں

کیا مزا ہے تیغ قاتل میں کہ اکثر صید عشق

آن کر اس پر رگڑتے اپنی گردن آپ ہیں

مجھ سے تم کیا پوچھتے ہو کیسے ہیں ہم کیا کہیں

جی ہی جانے ہے کہ جیسے مشفق من آپ ہیں

پر غرور و پر تکبر پر جفا و پر ستم

پر فریب و پر دغا پر مکر و پر فن آپ ہیں

ظلم پیشہ ظلم شیوہ ظلم ران و ظلم دوست

دشمن دل دشمن جاں دشمن تن آپ ہیں

یکہ تاز و نیزہ باز و عربدہ جو تند خو

تیغ زن دشنہ گزار و ناوک افگن آپ ہیں

تسمہ کش طراز و غارت گر تاراج ساز

کافر یغمائی و قزاق رہزن آپ ہیں

فتنہ جو بیداد گر سفاک و اظلم کینہ ور

گرم جنگ و گرم قتل و گرم کشتن آپ ہیں

بدمزاج و بددماغ و بدشعار و بدسلوک

بد طریق و بدزباں بدعہد و بدظن آپ ہیں

بے مروت بے وفا نامہرباں نا آشنا

میرے قاتل میرے حاسد میرے دشمن آپ ہیں

اے ظفرؔ کیا پائے قاتل کے ہے بوسے کی ہوس

یوں جو بسمل ہو کے سرگرم طپیدن آپ ہیں

jab kabhi dariya mein hote saya afgan ap hain

fals-e-mahi ko batate mah raushan ap hain

saite hain sozan se chak-e-sina kya ai chara saz

khar-e-gham sine main apne misl-e-sozan ap hain

pyar se kar ke hamail ghair ki gardan mein hath

marte tegh-e-sitam se mujh ko gardan ap hain

khinch kar ankhon main apni surma-e-dumbala dar

karte paida sehr se nargis mein sosan ap hain

dekh kar sahra mein mujh ko pahle ghabraya tha qais

phir jo pahchana to bola hazrat-e-man ap hain

ji dharakta hai kahin tar-e-rag-e-gul chubh na jae

sej par phulon ki karte qasd-e-khaftan ap hain

kya maza hai tegh-e-qatil mein ke aksar said-e-ishq

an kar us par ragarte apni gardan ap hain

mujh se tum kya puchhte ho kaise hain ham kya kahen

ji hi jane hai ke jaise mushfiq-e-man ap hain

par ghurur-o-par takabbur par jafa-o-par sitam

pur fareb-o-par dagha par makr-o-pur fan ap hain

zulm pesha zulm shewa zulm ran-o-zulm-e-dost

dushman-e-dil dushman-e-jan dushman tan ap hain

yakka taz-o-neza baz-o-arbada jo tund khu

tegh zan dashna guzar-o-nawak afgan ap hain

tasma kash taraz-o-gharat gar taraj saz

kafir yaghmai-o-qazzaq rahzan ap hain

fitna jo bedad gar saffak-o-azlam kina war

garm jang-o-garm qatl-o-garm kashtan ap hain

badmizaj-o-baddimagh-o-badshiar-o-badsuluk

bad tariq-o-badzaban badahd-o-badzan ap hain

be murawwat be wafa namehrban na ashna

mere qatil mere hasid mere dushman ap hain

ai zafar kya pae qatil ke hai bose ki hawas

yun jo bismil ho ke sargarm-e-tapidan ap hain