جب یار نے اٹھا کر زلفوں کے بال باندھے

جب یار نے اٹھا کر زلفوں کے بال باندھے

تب میں نے اپنے دل میں لاکھوں خیال باندھے

دو دن میں ہم تو ریجھے اے وائے حال ان کا

گزرے ہیں جن کے دل کو یاں ماہ و سال باندھے

تار نگہ میں اس کے کیونکر پھنسے نہ یہ دل

آنکھوں نے جس کے لاکھوں وحشی غزال باندھے

جو کچھ ہے رنگ اس کا سو ہے نظر میں اپنی

گو جامہ زرد پہنے یا چیرہ لال باندھے

تیرے ہی سامنے کچھ بہکے ہے میرا نالہ

ورنہ نشانے ہم نے مارے ہیں بال باندھے

بوسہ کی تو ہے خواہش پر کہیے کیونکہ اس سے

جس کا مزاج لب پر حرف سوال باندھے

ماروگے کس کو جی سے کس پر کمر کسی ہے

پھرتے ہو کیوں پیارے تلوار ڈھال باندھے

دو چار شعر آگے اس کے پڑھے تو بولا

مضموں یہ تو نے اپنے کیا حسب حال باندھے

سوداؔ جو ان نے باندھا زلفوں میں دل سزا ہے

شعروں میں اس کے تو نے کیوں خط و خال باندھے

jab yar ne utha kar zulfon ke bal bandhe

tab main ne apne dil mein lakhon khayal bandhe

do din mein ham to rijhe ai wae hal un ka

guzre hain jin ke dil ko yan mah-o-sal bandhe

tar-e-nigah mein us ke kyunkar phanse na ye dil

ankhon ne jis ke lakhon wahshi ghazal bandhe

jo kuchh hai rang us ka so hai nazar main apni

go jama zard pahne ya chira lal bandhe

tere hi samne kuchh bahke hai mera nala

warna nishane ham ne mare hain bal bandhe

bosa ki to hai khwahish par kahiye kyunke us se

jis ka mizaj lab par harf-e-sawal bandhe

maroge kis ko ji se kis par kamar kisi hai

phirte ho kyun pyare talwar dhal bandhe

do char sher age us ke parhe to bola

mazmun ye tu ne apne kya hasb-e-hal bandhe

sauda jo un ne bandha zulfon mein dil saza hai

sheron mein us ke tu ne kyun khat-o-khal bandhe