اہل الفت سے تنے جاتے ہیں

اہل الفت سے تنے جاتے ہیں

روز روز آپ بنے جاتے ہیں

ذبح تو کرتے ہو کچھ دھیان بھی ہے

خون میں ہاتھ سنے جاتے ہیں

روٹھنا ان کا غضب ڈھائے گا

اب وہ کیا جلد منے جاتے ہیں

کچھ ادھر دل بھی کھنچا جاتا ہے

کچھ ادھر وہ بھی تنے جاتے ہیں

کیوں نہ غم ہو مجھے رسوائی کا

وہ مرے ساتھ سنے جاتے ہیں

دل نہ گھبرائے کہ وہ روٹھ گئے

چار فقروں میں منے جاتے ہیں

ہے یہ مطلب نہیں چھیڑے کوئی

بیٹھے بیٹھے وہ تنے جاتے ہیں

بے وفاؤں سے وفا کی امید

نوحؔ نادان بنے جاتے ہیں

ahl-e-ulfat se tane jate hain

roz roz ap bane jate hain

zabh to karte ho kuchh dhyan bhi hai

khun mein hath sune jate hain

ruthna un ka ghazab dhaega

ab wo kya jald mane jate hain

kuchh idhar dil bhi khincha jata hai

kuchh idhar wo bhi tane jate hain

kyun na gham ho mujhe ruswai ka

wo mire sath sune jate hain

dil na ghabrae ke wo ruth gae

char fiqron mein mane jate hain

hai ye matlab nahin chhere koi

baithe baithe wo tane jate hain

be wafaon se wafa ki ummid

nuh nadan bane jate hain