جب سے تمہاری آنکھیں عالم کو بھائیاں ہیں

جب سے تمہاری آنکھیں عالم کو بھائیاں ہیں

تب سے جہاں میں تم نے دھومیں مچائیاں ہیں

جور و جفا و محنت مہر و وفا و الفت

تم کیوں بڑھائیاں ہیں اور کیوں گھٹائیاں ہیں

مل مل کے روٹھ جانا اور روٹھ روٹھ ملنا

یہ کیا خرابیاں ہیں کیا جگ ہنسائیاں ہیں

ٹک ٹک سرک سرک کر آ بیٹھنا بغل میں

کیا اچپلائیاں ہیں اور کیا ڈھٹائیاں ہیں

زلفوں کا بل بناتے آنکھیں چرا کے چلنا

کیا کم نگاہیاں ہیں کیا کج ادائیاں ہیں

آئینہ روبرو رکھ اور اپنی سج بنانا

کیا خود پسندیاں ہیں کیا خود نمائیاں ہیں

آنچل اٹھا کے تم نے جو ڈھانک لیں یہ چھتیاں

کس کو دکھائیاں ہیں کس سے چھپائیاں ہیں

تم میں جو شوخیاں ہیں اور چنچلائیاں ہیں

کن نے سکھائیاں ہیں کن نے بتائیاں ہیں

حاتمؔ کے بن اشارہ سچ کہہ یہ چشم و ابرو

کس سے لڑائیاں ہیں کس پر چڑھائیاں ہیں

jab se tumhari ankhen alam ko bhaiyan hain

tab se jahan mein tum ne dhumen machayan hain

jaur-o-jafa-o-mehnat mehr-o-wafa-o-ulfat

tum kyun barhaiyan hain aur kyun ghataiyan hain

mil mil ke ruth jana aur ruth ruth milna

ye kya kharabiyan hain kya jag hansaiyan hain

tuk tuk sarak sarak kar a baithna baghal mein

kya achpalayan hain aur kya dhitaiyan hain

zulfon ka bal banate ankhen chura ke chalna

kya kam nigahiyan hain kya kaj adaiyan hain

aina rubaru rakh aur apni saj banana

kya khud pasandiyan hain kya khud numaiyan hain

anchal utha ke tum ne jo dhank len ye chhattiyan

kis ko dikhaiyan hain kis se chhapaiyan hain

tum mein jo shokhiyan hain aur chunchalaiyan hain

kin ne sakhaiyan hain kin ne butaiyan hain

hatim ke ban ishara sach kah ye chashm-o-abru

kis se laraiyan hain kis par charhaiyan hain