جب اپنے دل پہ اپنا کچھ اختیار دیکھا
علی منظور حیدرآبادیجب اپنے دل پہ اپنا کچھ اختیار دیکھا
بیگانہ خو حسیں کو بیگانہ وار دیکھا
پیہم تجلیوں کی مجھ میں سکت کہاں تھی
نظریں چرا چرا کر سوئے نگار دیکھا
آج اپنی بے خودی کو عرفاں کی روشنی میں
اس ماہ سیم تن کا آئینہ دار دیکھا
تیری عنایتوں سے انجام بیں نظر میں
آغاز عشق ہی میں انجام کار دیکھا
یہ بھولی بھولی صورت اے چاند پھر بھی تو نے
میری طرف سے اپنے دل میں غبار دیکھا
حسن شباب پرور کس درجے سحر زا ہے
دیکھا ترا زمانہ اے گل عذار دیکھا
اس شوخ کی گلی میں منظور تفتہ جاں کو
پھر بے قرار پایا پھر اشک بار دیکھا
jab apne dil pe apna kuchh ikhtiyar dekha
begana khu hasin ko begana war dekha
paiham tajalliyon ki mujh mein sakat kahan thi
nazren chura chura kar su-e-nigar dekha
aj apni be khudi ko irfan ki raushni mein
us mah sim tan ka aina dar dekha
teri inayaton se anjam bin nazar mein
aghaz-e-ishq hi mein anjam-e-kar dekha
ye bhuli bhuli surat ai chand phir bhi tu ne
meri taraf se apne dil mein ghubar dekha
husn-e-shabab parwar kis darje sehr za hai
dekha tira zamana ai gul-e-izar dekha
us shokh ki gali mein manzur tafta jan ko
phir be qarar paya phir ashk bar dekha