جاڑے میں کیا مزہ ہو وہ تو سمٹ رہے ہوں

جاڑے میں کیا مزہ ہو وہ تو سمٹ رہے ہوں

اور کھول کر رضائی ہم بھی لپٹ رہے ہوں

اب آپ کی دموں میں ہم آ چکے ہٹو بھی

خوش آوے پیارے کس کو جب دل ہی کٹ رہے ہوں

کیوں کر زباں سے ان کی اپنا بچاؤ ہووے

ذات و صفات سب کے جب وہ اکٹ رہے ہوں

آتے تھے ساتھ میرے دیکھو تو کیا ہوئے وہ

ایسا نہ ہو کہ پیچھے رشتہ میں کٹ رہے ہوں

تب سیر دیکھے کوئی باہم لڑائیوں کے

کھینچے ہوں وہ تو تیغا اور ہم بھی ڈٹ رہے ہوں

کیا کر سکیں دوانے حال دل پریشاں

زلفوں کے بال ان کے جب آپ لٹ رہے ہوں

آپس میں روٹھنے کا انداز ہو تو یہ ہو

وہ ہم سے پھٹ رہے ہوں ہم ان سے پھٹ رہے ہوں

جی چاہتا ہے اے دل اک ایسی رات آوے

سوتے ہوں چاندنی میں وہ منہ لپیٹے اور ہم

شبنم کا وہ دوپٹہ پٹھے الٹ رہے ہوں

پنجم غزل اب انشاؔ انداز کی سنا دی

آغوش میں معانی جس کے لپٹ رہے ہوں

jare mein kya maza ho wo to simat rahe hun

aur khol kar rizai ham bhi lipat rahe hun

ab ap ki damon mein ham a chuke hato bhi

khush awe pyare kis ko jab dil hi kat rahe hun

kyun kar zaban se un ki apna bachao howe

zat-o-sifat sab ke jab wo akat rahe hun

ate the sath mere dekho to kya hue wo

aisa na ho ke pichhe rishta mein kat rahe hun

tab sair dekhe koi baham laraiyon ke

khinche hun wo to tegha aur ham bhi dat rahe hun

kya kar saken diwane hal-e-dil-e-pareshan

zulfon ke bal un ke jab ap lut rahe hun

apas mein ruthne ka andaz ho to ye ho

wo ham se phat rahe hun ham un se phat rahe hun

ji chahta hai ai dil ik aisi rat awe

sote hun chandni mein wo munh lapete aur ham

shabnam ka wo dupatta patthe ulat rahe hun

panjum ghazal ab insha andaz ki suna di

aghosh mein maani jis ke lipat rahe hun