تھا پاس ابھی کدھر گیا دل — شیخ ظہور الدین حاتم (Shah Hatim)

تھا پاس ابھی کدھر گیا دل

یہ خانہ خراب گھر گیا دل

خوار ایسا ہوا بتاں کے پیچھے

نظروں سے مری اتر گیا دل

شبنم کی مثال روتے روتے

اس باغ سے چشم تر گیا دل

جوں خضر رہا ہمیشہ تنہا

ایسے جینے سے بھر گیا دل

کیا پوچھتے ہو خبر تم اس کی

یک عمر ہوئی کہ مر گیا دل

مرتے مرتے بھی یہ جواں مرگ

سوراخ جگر میں کر گیا دل

تھا دشمن جاں بغل میں حاتمؔ

جانے دے بلا سے گر گیا دل