تھکا لے اور دور آسماں تک

تھکا لے اور دور آسماں تک

پھر آخر گردش قسمت کہاں تک

بڑی اس دل کی بیتابی یہاں تک

ہمیں ہمیں ہم ہیں زمیں سے آسماں تک

دم وعدہ انہیں ہے بار ہاں تک

زباں تھک جائے جو اے بے زباں تک

مجھے پینا پڑے آخر وہ آنسو

جو بھر جاتے زمیں سے آسماں تک

کوئی سو بار اڑے سو بار بیٹھے

قفس سے یوں ہم آئے آشیاں تک

گلا بھی تھا کسی کا راز کوئی

کہ آ کر رہ گیا میری زباں تک

سلامت ہیں اگر میرے پر و بال

قفس جائے گا اڑ کر آشیاں تک

مری بیداریاں بیکار کیوں جائیں

انہیں پہنچا دو چشم پاسباں تک

کچھ اس نے اس طرح کاٹی مری بات

کہ ٹکڑے ہو گئی میری زباں تک

جنوں سے ہم نہ کوتاہی کریں گے

ہمارا ہاتھ پہنچے گا جہاں تک

خدایا میرے سجدے دور ہی سے

پہنچ جائیں کسی کے آستاں تک

سہارا کچھ تو درماندوں کو ہوتا

پہنچ جاتے جو گرد کارواں تک

مری فریاد سن کر چپ رہیں گے

اسے پہنچائیں گے وہ آسماں تک

مجھی پر چھوڑ دو میری مئے تلخ

مزا اس کا ہے کچھ میری زباں تک

کلیسا و حرم دونوں ہیں آباد

مرے ناقوس تک میری اذاں تک

کچھ ایسا ربط ہے صیاد کے ساتھ

ہمیں ہم ہیں قفس سے آشیاں تک

ہمیں ٹھکراتے جائیں جو وہاں جائیں

پہنچ جائیں یوں ہی ہم آستاں تک

معاصی کے سوا دو دو فرشتے

انہیں لادے پھروں یا رب کہاں تک

پہنچ جاؤں جو یا رب میکدے میں

مرا پانی بھرے پیر مغاں تک

وہ خوگر نالہ دشمن کا ہو جائے

نہ سنتا ہو جو حرف داستاں تک

ریاضؔ آنے میں ہے ان کے ابھی دیر

چلو ہو آئیں مرگ ناگہاں تک

thaka le aur daur-e-asman tak

phir akhir gardish-e-qismat kahan tak

bari is dil ki betabi yahan tak

hamen hamen ham hain zamin se asman tak

dam-e-waada unhen hai bar han tak

zaban thak jae jo ai be zaban tak

mujhe pina pare akhir wo ansu

jo bhar jate zamin se asman tak

koi sau bar ure sau bar baithe

qafas se yun ham ae ashiyan tak

gila bhi tha kisi ka raz koi

ke a kar rah gaya meri zaban tak

salamat hain agar mere par-o-bal

qafas jaega ur kar ashiyan tak

miri bedariyan bekar kyun jaen

unhen pahuncha do chashm-e-pasban tak

kuchh us ne is tarah kati miri bat

ke tukre ho gai meri zaban tak

junun se ham na kotahi karenge

hamara hath pahunchega jahan tak

khudaya mere sajde dur hi se

pahunch jaen kisi ke astan tak

sahara kuchh to darmandon ko hota

pahunch jate jo gard-e-karwan tak

miri fariyad sun kar chup rahenge

use pahunchaenge wo asman tak

mujhi par chhor do meri mai-e-talkh

maza us ka hai kuchh meri zaban tak

kalisa-o-haram donon hain abad

mire naqus tak meri azan tak

kuchh aisa rabt hai sayyad ke sath

hamen ham hain qafas se ashiyan tak

hamen thukrate jaen jo wahan jaen

pahunch jaen yun hi ham astan tak

maasi ke siwa do do farishte

unhen lade phirun ya rab kahan tak

pahunch jaun jo ya rab maikade mein

mira pani bhare pir-e-mughan tak

wo khugar nala dushman ka ho jae

na sunta ho jo harf-e-dastan tak

riyaz ane mein hai un ke abhi der

chalo ho aen marg-e-nagahan tak