آخر یہ حسن چھپ نہ سکے گا نقاب میں

آخر یہ حسن چھپ نہ سکے گا نقاب میں

شرماؤ گے تمہیں نہ کرو ضد حجاب میں

پامال شوخیوں میں کرو تم زمین کو

ڈالوں فلک پے زلزلہ میں اضطراب میں

روشن ہے آفتاب کی نسبت چراغ سے

نسبت وہی ہے آپ میں اور آفتاب میں

دل کی گرہ نہ وا ہوئی درد شب وصال

گزری تمام بست و کشاد نقاب میں

جاں میں نے نامہ بر کے قدم پر نثار کی

تھا پیش پا فتادہ یہ مضموں جواب میں

ہنس ہنس کے برق کو تو ذرا کیجے بے قرار

رو رو کے ابر کو میں ڈبوتا ہوں آب میں

واعظ سے ڈر گئے کہ نہ شامل ہوئے ہم آج

ترتیب محفل مے و چنگ و رباب میں

ساقی ادھر تو دیکھ کہ ہم دیر‌ مست ہیں

کچھ مستی‌ٔ نگہ بھی ملا دے شراب میں

داخل نہ دشمنوں میں نہ احباب میں شمار

مد فضول ہوں میں تمہارے حساب میں

کس کس کے جور اٹھائیں گے آگے کو دیکھیے

دشمن ہے چرخ پیر زمان شباب میں

پیغامبر اشارۂ ابرو سے مر گیا

پھر جی اٹھے گا لب بھی ہلا دو جواب میں

akhir ye husn chhup na sakega naqab mein

sharmaoge tumhen na karo zid hijab mein

pamal shokhiyon mein karo tum zamin ko

dalun falak pe zalzala mein iztirab mein

raushan hai aftab ki nisbat charagh se

nisbat wahi hai ap mein aur aftab mein

dil ki girah na wa hui dard-e-shab-e-wisal

guzri tamam bast-o-kushad-e-naqab mein

jan main ne nama bar ke qadam par nisar ki

tha pesh-e-pa fatada ye mazmun jawab mein

hans hans ke barq ko to zara kije be qarar

ro ro ke abr ko main dubota hun ab mein

waiz se dar gae ke na shamil hue ham aj

tartib-e-mahfil-e-mai-o-chang-o-rabab mein

saqi idhar to dekh ke ham der mast hain

kuchh masti-e-nigah bhi mila de sharab mein

dakhil na dushmanon mein na ahbab mein shumar

mad-e-fuzul hun main tumhare hisab mein

kis kis ke jaur uthaenge age ko dekhiye

dushman hai charkh-e-pir-e-zaman-e-shabab mein

paighambar ishara-e-abru se mar gaya

phir ji uthega lab bhi hila do jawab mein