تیری یاد

سحر و شام تجھے یاد کیا کرتے ہیں

تیری ہی یاد سے دل شاد کیا کرتے ہیں

حق تو یہ ہے کہ شب و روز تیری رحمت سے

دل برباد کو آباد کیا کرتے ہیں

تجھ کو منظور ہے آسائش خلقت یا رب

تیرے بندے ستم ایجاد کیا کرتے ہیں

بن کے پنچھی جو گرفتار بلا ہوتے ہیں

وہ فقط شکوۂ بیداد کیا کرتے ہیں

آگ لگ جائے مبادا کہیں صیاد کے گھر

ڈر کے آہ دل ناشاد کیا کرتے ہیں

جو گلا پھاڑ کے مرغان سحر بولتے ہیں

اپنے نالوں کو وہ برباد کیا کرتے ہیں

عشق والے پوریؔ پروانہ صفت جلتے ہیں

وہ تڑپتے ہیں نہ فریاد کیا کرتے ہیں

sahar-o-sham tujhe yad kiya karte hain

teri hi yad se dil shad kiya karte hain

haq to ye hai ke shab-o-roz teri rahmat se

dil-e-barbad ko abad kiya karte hain

tujh ko manzur hai asaish-e-khilqat ya rab

tere bande sitam ijad kiya karte hain

ban ke panchhi jo giraftar-e-bala hote hain

wo faqat shikwa-e-bedad kiya karte hain

ag lag jae mabada kahin sayyad ke ghar

dar ke ah dil-e-nashad kya karte hain

jo gila phar ke murghan-e-sahar bolte hain

apne nalon ko wo barbad kiya karte hain

ishq wale puri parwana sifat jalte hain

wo tarapte hain na fariyad kiya karte hain