تیری صورت کو دیکھتا ہوں میں

تیری صورت کو دیکھتا ہوں میں

اس کی قدرت کو دیکھتا ہوں میں

جب ہوئی صبح آ گئے ناصح

انہیں حضرت کو دیکھتا ہوں میں

وہ مصیبت سنی نہیں جاتی

جس مصیبت کو دیکھتا ہوں میں

دیکھنے آئے ہیں جو میری نبض

ان کی صورت کو دیکھتا ہوں میں

موت مجھ کو دکھائی دیتی ہے

جب طبیعت کو دیکھتا ہوں میں

شب فرقت اٹھا اٹھا کر سر

صبح عشرت کو دیکھتا ہوں میں

دور بیٹھا ہوا سر محفل

رنگ صحبت کو دیکھتا ہوں میں

ہر مصیبت ہے بے مزا شب غم

آفت آفت کو دیکھتا ہوں میں

نہ محبت کو جانتے ہو تم

نہ مروت کو دیکھتا ہوں میں

کوئی دشمن کو یوں نہ دیکھے گا

جیسے قسمت کو دیکھتا ہوں میں

حشر میں داغؔ کوئی دوست نہیں

ساری خلقت کو دیکھتا ہوں میں

teri surat ko dekhta hun main

us ki qudrat ko dekhta hun main

jab hui subh a gae naseh

unhen hazrat ko dekhta hun main

wo musibat suni nahin jati

jis musibat ko dekhta hun main

dekhne ae hain jo meri nabz

un ki surat ko dekhta hun main

maut mujh ko dikhai deti hai

jab tabiat ko dekhta hun main

shab-e-furqat utha utha kar sar

subh ishrat ko dekhta hun main

dur baitha hua sar-e-mahfil

rang-e-sohbat ko dekhta hun main

har musibat hai be maza shab-e-gham

afat afat ko dekhta hun main

na mohabbat ko jante ho tum

na murawwat ko dekhta hun main

koi dushman ko yun na dekhega

jaise qismat ko dekhta hun main

hashr mein dagh koi dost nahin

sari khilqat ko dekhta hun main