توانا ہوں دل رنجور کی سوگند کیوں کھاؤں

توانا ہوں دل رنجور کی سوگند کیوں کھاؤں

میں جب مختار ہوں مجبور کی سوگند کیوں کھاؤں

مجھے عرش بریں کے جلوۂ دائم سے نسبت ہے

کوئی واعظ ہوں میں بھی حور کی سوگند کیوں کھاؤں

مرا طور تجلی رات دن ہے میرے پہلو میں

نہیں جب آگ لینا طور کی سوگند کیوں کھاؤں

مرا ہر نا چکیدہ اشک کا قطرہ ہے بے ساحل

میں طوفان بلا تنور کی سوگند کیوں کھاؤں

حقیقت میں مری خاموشیاں پردہ ہیں محشر کا

ہوں خورشید قیامت صور کی سوگند کیوں کھاؤں

انا الحق کی بجائے میں علی الحق کا ہوں آوازہ

پڑی ہے کیا مجھے منصور کی سوگند کیوں کھاؤں

کلاہ فقر جب میں نے ازل سے اوڑھ رکھی ہے

امیںؔ تو ہی بتا فغفور کی سوگند کیوں کھاؤں

tawana hun dil-e-ranjur ki saugand kyun khaun

main jab mukhtar hun majbur ki saugand kyun khaun

mujhe arsh-e-barin ke jalwa-e-daim se nisbat hai

koi waiz hun main bhi hur ki saugand kyun khaun

mira tur-e-tajalli rat din hai mere pahlu mein

nahin jab ag lena tur ki saugand kyun khaun

mira har na chukida ashk ka qatra hai be sahil

main tufan-e-bala tannur ki saugand kyun khaun

haqiqat mein miri khamoshiyan parda hain mahshar ka

hun khurshid-e-qayamat sur ki saugand kyun khaun

ana alhaq ki bajae mein ali alhaq ka hun awaza

pari hai kya mujhe mansur ki saugand kyun khaun

kulah-e-faqr jab main ne azal se orh rakhi hai

amin tu hi bata faghfur ki saugand kyun khaun