تنہائی (عظیم الدین احمد)

مجھ سا تنہا نہیں دنیا میں خدایا کوئی

میں نہ اپنا ہوں کسی کا بھی نہ میرا کوئی

کیا ملا مجھ کو چہل سالہ رفاقت کرکے

اب کسی پر نہ کرے آہ بھروسا کوئی

تابش ہجر نے دل کی یہ بنا دی صورت

جیسے ہو دھوپ میں تپتا ہوا صحرا کوئی

آتش شوق کی اٹھتی ہیں کچھ ایسی لہریں

جس طرح آگ کا بھڑکا ہوا دریا کوئی

ایک وہ دن تھا کہ روتوں کو ہنسا دیتا تھا

اب تو روتا ہوں جو دیکھا کہیں ہنستا کوئی

میں ہوں نیرنگی عالم کی مجسم تصویر

مجھ سے بہتر نہیں عبرت کا تماشا کوئی

میں وہ قطرہ ہوں سمندر سے جو محروم رہا

مجھ کو کیا موج میں آیا کرے دریا کوئی

بے رخی آہ یہ کیسی ہے کہ اس عالم میں

ملے لاکھوں نہ ہوا ایک بھی اپنا کوئی

mujh sa tanha nahin duniya mein khudaya koi

main na apna hun kisi ka bhi na mera koi

kya mila mujh ko chahal sala rifaqat karke

ab kisi par na kare ah bharosa koi

tabish-e-hijr ne dil ki ye bana di surat

jaise ho dhup mein tapta hua sahra koi

atish-e-shauq ki uthti hain kuchh aisi lahren

jis tarah ag ka bharka hua dariya koi

ek wo din tha ke roton ko hansa deta tha

ab to rota hun jo dekha kahin hansta koi

main hun nairangi-e-alam ki mujassam taswir

mujh se behtar nahin ibrat ka tamasha koi

main wo qatra hun samundar se jo mahrum raha

mujh ko kya mauj mein aya kare dariya koi

be rukhi ah ye kaisi hai ke is alam mein

mile lakhon na hua ek bhi apna koi