تو دیکھ اسے سب جا آنکھوں کے اٹھا پردے
Shah Hatim (1699–1783)تو دیکھ اسے سب جا آنکھوں کے اٹھا پردے
مانند سویدا کے دل بیچ اسے گھر دے
عالم کے مرقع میں تصویر اسی کی ہے
سب حسن یہاں یارو اس حسن کے ہیں گردے
صیاد کا شرمندہ ہوں بے پر و بالی سے
اڑ کر ابھی جا پہنچوں جو مجھ کو خدا پر دے
ساقی تجھے کم ظرفی مستوں سے نہیں لازم
ترسا نہ مجھے کافر ساغر کے تئیں بھر دے
بزم دل مشتاقاں جوں شام غریباں ہے
یک جلوہ میں تو روشن آ شمع صفت کر دے
ہم عرض کیا اس کی خدمت میں کہ اے صاحب
اتنے ترے بندوں میں ایک ہم بھی ہیں نو وردے
دولت سے تری سب کچھ ہم پاس مہیا ہے
لب خشک و جگر بریاں چشم تر و دل سر دے
حاتمؔ وہ لگا کہنے غصے سے کہ چل جھوٹھے
بندا میں اسے جانوں جو پہلے قدم سر دے
ہشیار کروں حاتمؔ مستوں کو نگاہوں میں
قطرہ مئے وحدت سے جو ساقیٔ کوثر دے
tu dekh use sab ja ankhon ke utha parde
manind-e-suwaida ke dil bich use ghar de
alam ke muraqqaa mein taswir usi ki hai
sab husn yahan yaro us husn ke hain gurde
sayyad ka sharminda hun be par-o-bali se
ur kar abhi ja pahunchun jo mujh ko khuda par de
saqi tujhe kam zarfi maston se nahin lazim
tarsa na mujhe kafir saghar ke tain bhar de
bazm-e-dil-e-mushtaqan jun sham-e-ghariban hai
yak jalwa mein to raushan a shama sifat kar de
ham arz kiya us ki khidmat mein ke ai sahab
itne tire bandon mein ek ham bhi hain nau warde
daulat se tiri sab kuchh ham pas mahiya hai
lab khushk-o-jigar buriyan chashm-e-tar-o-dil sar de
hatim wo laga kahne ghusse se ke chal jhuthe
banda mein use janun jo pahle qadam sar de
hushyar karun hatim maston ko nigahon mein
qatra mai-e-wahdat se jo saqi-e-kausar de