تو صبح دم نہ نہا بے حجاب دریا میں

تو صبح دم نہ نہا بے حجاب دریا میں

پڑے گا شور کہ ہے آفتاب دریا میں

چلو شراب پئیں بیٹھ کر کنارے آج

کہ ہووے رشک سے ماہی کباب دریا میں

تمہارے منہ کی صفائی و آب داری دیکھ

بہا ہے شرم سے موتی ہو آب دریا میں

میں اس طرح سے ہوں مہماں سرائے دنیا میں

کہ جس طرح سے ہے کوئی حباب دریا میں

جہاں کے بہر میں ہر موج بوجھ سیل فنا

بنا نہ گھر کو تو خانہ خراب دنیا میں

کبھو جو عالم مستی میں تم نے کی تھی نگاہ

بجائے آب بہے ہے شراب دریا میں

میں آب چشم میں ہوں غرق مجھ کو نیند کہاں

کہیں کسو کو بھی آیا ہے خواب دریا میں

اگر ہے علم جو تجھ کو عمل کے در پے ہو

وگرنہ شیخ ڈبا دے کتاب دریا میں

صنم کی زلف کی لہروں کے رشک سے حاتمؔ

نہیں یہ موج یہ ہے پیچ و تاب دریا میں

tu subh dam na naha be hijab dariya mein

parega shor ke hai aftab dariya mein

chalo sharab piyen baith kar kinare aj

ke howe rashk se mahi kabab dariya mein

tumhare munh ki safai-o-ab dari dekh

baha hai sharm se moti ho ab dariya mein

main is tarah se hun mehman sarae duniya mein

ke jis tarah se hai koi habab dariya mein

jahan ke bahr mein har mauj bojh sail-e-fana

bana na ghar ko to khana kharab duniya mein

kabhu jo alam masti mein tum ne ki thi nigah

bajae ab bahe hai sharab dariya mein

main ab-e-chashm mein hun gharq mujh ko nind kahan

kahin kisu ko bhi aya hai khwab dariya mein

agar hai ilm jo tujh ko amal ke dar pe ho

wagarna shaikh daba de kitab-e-dariya mein

sanam ki zulf ki lahron ke rashk se hatim

nahin ye mauj ye hai pech-o-tab dariya mein