تمہارے عشق میں ہم ننگ و نام بھول گئے

تمہارے عشق میں ہم ننگ و نام بھول گئے

جہاں میں کام تھے جتنے تمام بھول گئے

نمازیوں نے تجھ ابرو کو دیکھ مسجد میں

بہ سمت قبلہ سجود و قیام بھول گئے

یہ وضع کیا ہے کہ ہوتے نہیں ہو دست بسر

ابھی سے اپنوں کا لینا سلام بھول گئے

گئے تھے زعم میں اپنے پر اس کو دیکھتے ہی

جو دل نے ہم سے کہے تھے پیام بھول گئے

تری طرف ہوئی صورت گران چیں کی نگاہ

قلم کو ہاتھ سے رکھ اپنا کام بھول گئے

بتان چرب زباں سن کے خوبئ گفتار

ادب میں دب گئے حسن کلام بھول گئے

تری اے سرو رواں دیکھ کر انوکھی چال

جو خوش خرام تھے اپنا خرام بھول گئے

تری یہ زلف گرہ گیر دیکھ کر صیاد

شکار آپ ہوئے صید و دام بھول گئے

بڑا غضب ہے کہ حاتمؔ کو تم نہ پہچانا

وہی قدیم تمہارا غلام بھول گئے

tumhare ishq mein ham nang-o-nam bhul gae

jahan mein kam the jitne tamam bhul gae

namaziyon ne tujh abru ko dekh masjid mein

ba samt qibla sujud-o-qayam bhul gae

ye waza kya hai ke hote nahin ho dast basar

abhi se apnon ka lena salam bhul gae

gae the zaam main apne par us ko dekhte hi

jo dil ne ham se kahe the payam bhul gae

tiri taraf hui surat garin chin ki nigah

qalam ko hath se rakh apna kam bhul gae

butan-e-charb zaban sun ke khubi-e-guftar

adab mein dab gae husn-e-kalam bhul gae

tiri ai sarw rawan dekh kar anokhi chal

jo khush khiram the apna khiram bhul gae

tiri ye zulf-e-girah gir dekh kar sayyad

shikar ap hue said-o-dam bhul gae

bara ghazab hai ke hatim ko tum na pahchana

wahi qadim tumhara ghulam bhul gae