تمہید (ضربِ کلیم)

نہ دیر میں نہ حرم میں خودی کی بیداری

کہ خاوراں میں ہے قوموں کی رُوح تریاکی

اگر نہ سہل ہوں تجھ پر زمیں کے ہنگامے

بُری ہے مستیِ اندیشہ ہائے افلاکی

تری نجات غمِ مرگ سے نہیں ممکن

کہ تُو خودی کو سمجھتا ہے پیکرِ خاکی

زمانہ اپنے حوادث چھُپا نہیں سکتا

ترا حِجاب ہے قلب و نظر کی ناپاکی

عطا ہُوا خس و خاشاکِ ایشیا مجھ کو

کہ میرے شُعلے میں ہے سرکشی و بے باکی!

ترا گُناہ ہے اقبالؔ! مجلس آرائی

اگرچہ تُو ہے مثالِ زمانہ کم پیوند

جو کوکنار کے خُوگر تھے، اُن غریبوں کو

تری نَوا نے دیا ذوقِ جذبہ ہائے بلند

تڑپ رہے ہیں فضاہائے نیلگوں کے لیے

وہ پَر شکستہ کہ صحنِ سرا میں تھے خورسند

تری سزا ہے نوائے سحَر سے محرومی

مقامِ شوق و سروُر و نظر سے محرومی

na der mein na haram mein khudi ki bedari

ke khawaran mein hai qaumon ki ruh tiryaki

agar na sahl hun tujh par zamin ke hangame

buri hai masti-e-andesha ha-e-aflaki

tiri najat gham-e-marg se nahin mumkin

ke tu khudi ko samajhta hai paikar-e-khaki

zamana apne hawadis chhupa nahin sakta

tira hijab hai qalb-o-nazar ki napaki

ata hua khas-o-khashak-e-eshiya mujh ko

ke mere shole mein hai sarkashi-o-be baki!

tira gunah hai iqbal! majlis arai

agarche tu hai misal-e-zamana kam paiwand

jo koknar ke khugar the, un gharibon ko

tiri nawa ne diya zauq-e-jazba ha-e-buland

tarap rahe hain fazahae nilgun ke liye

wo par shikasta ke sehn-e-sara mein the khursand

tiri saza hai nawa-e-sahar se mahrumi

maqam-e-shauq-o-surur-o-nazar se mahrumi